Улс төрийн намын тухай хуулийн дагуу тун удахгүй АН ээлжит их хурлаа хийж, намын даргаа албан ёсоор сонгосон тогтоолоо Улсын дээд шүүхэд хүргүүлэх учиртай.

 

Ингэснээр АН-ын даргаар сонгогдсон С.Эрдэнийн бүрэн эрх албан ёсоор баталгаажих юм.Үүнтэй зэрэгцэн, АН-ын удирдлагын багт хэн ажиллах вэ? гэдэг асуулт гарч ирж буй билээ. УИХ-ын гишүүн Ж.Батзандан намын дарга С.Эрдэнийхээ өмнөх үүрэгт ажлыг авч, УИХ дахь АН-ын бүлгийн дарга болох нь бараг л тодорхой болсон.

 

Харин намын өдөр тутмын үйл ажиллагааг удирдан  зохион байгуулах үүрэгтэй АН-ын Ерөнхий Нарийн Бичгийн даргаар хэн ажиллах вэ? гэдэг нь улс төрийн хүрээнд ихээхэн сонирхол татаж байна. Ямартай ч  АН-ын шинэ дарга  С.Эрдэнэ өөрийн "Ардчилсан Хүчний Холбоо" фракциасаа Ерөнхий Нарийн Бичгийн Даргаа сонгож, багаар ажиллахыг илүүд үзэж буй бололтой. УИХ-ын гишүүн асан Д.Ганхуяг, Г.Баярсайхан нарын нэрс нэн түрүүнд яригдаж буй бол шинэ залуу, эрч хүчтэй хүн гэдэг утгаараа ч , ШӨХТГ-ын даргаар ажиллах хугацаандаа чадврлаг зохион байгуулагч гэдгээ харуулснаараа ч О.Магнай тэдний маш хүчтэй өрсөлдөгч болж буй аж.

 

Мөн БНН-ын дарга Б.Жаргалсайхан АН-д элсэн, АН-ын Ерөнхий Нарийн Бичгийн дарга болох буюу Монгол Улсын Ерөнхийлөгчийн 2017 оны сонгуульд өрсөлдөх санаатай байгаа гэнэ. Тэрээр АН-ын даргаар сонгогдсон С.Эрдэнийн штабын голлох хүн, санхүүгийн дэмжлэг үзүүлэгчдийн нэг байсан билээ.