Өнгөрсөн өдрүүдэд Эх орны төлөө хандивын аяны талаар иргэдийн дунд нэлээд их хэлэлцүүлэг өрнөөд байгаа юм.

Тэгвэл Ерөнхий сайд Ж.Эрдэнэбат Монгол Улсын Засгийн газар иргэдээсээ хандив авч өрөө төлөх хүртэлээ дампуурчихаагүй байгаа гэдгээ илэрхийлсэн. Гэсэн ч иргэдээс ирсэн хандивын данс нээж үүнийг ил тодоор зарла гэсэн чиг үүрэг өгчээ. 

Ерөнхий сайд Ж.Эрдэнэбат “Хандив бол иргэдийн сайн дурын аян. Засгийн газар ийм аяныг эхлүүл гэж хэлээгүйтэй адил иргэдийнхээ сайн дурын санаачилгыг зогсоо гэж үүрэгдэх боломжгүй. Эх орноо гэж байгаа сайхан сэтгэлтэй хүнийг , түүний үйлдлийг ч цааш түлхэж болохгүй. Тийм учраас Төрийн сан дээр хандивын нэгдсэн данс нээ. Хандив хүлээж авах тодорхой хугацаа тогтоож, энэ хугацаанд  ирсэн орлого, хандивыг өдөр бүр олон нийтэд ил тод мэдээлж байхыг  Сангийн сайд Б.Чойжилсүрэнд үүрэг болгож байна. Гэхдээ Монголын төр, Засгийн газар ард түмнээсээ хандив цуглуулж бондын өр төлөхгүй. Иргэдийн хандиваас нэг ч төгрөгийг  бондын өр төлөлтөд зарцуулахгүй. Засгийн газар ирэх гуравдугаар сард төлөх бондын өрөө хэрхэн төлөх шийдлээ нэгэнт олсон, хугацаанд нь бүрэн төлөх боломжтой болсон байгаа. Харин иргэдээс сайн дурын үндсэн дээр цугларсан хандивыг Засгийн газрын хуралдаанаар хэлэлцэж байгаад эрүүл мэнд, боловсрол, нийслэлийн утааг бууруулах, дэд бүтцийн шинэчлэл зэрэгт ард түмнийхээ хяналт дор зарцуулна” гэлээ.

Мөн эх оронч санаачилга эхлүүлсэн, үүнд нэгдсэн иргэдэд Монгол Улсын Засгийн газрын нэрийн өмнөөс албан ёсоор талархал илэрхийлэх, хандивын аянд оролцсоныг нотлох батламж хадгалуулах зэргээр тухайн иргэдийг алдаршуулахыг холбогдох сайд нарт үүрэг болгожээ.

Ямартаа ч бондын өрөндөө иргэдийн хандивыг зарцуулахгүй гэж мэдэгдсэн Засгийн газар цаашид юунд энэ мөнгийг зарцуулахыг ажиглаж л суухаас даа. Үүнээс гадна нэгэнт санаачлага эхэлсэн л хойн боломж бололцоотой эрхэмүүд хандиваа үргэлжлүүлээрэй. 

Харин өдөр хоногоо яая даа гэж байгаа эгэл жирийн иргэдээс юу хараад хэрэггүй шүү гэдгийг дахин дахин хэлмээр байна. 

С.Отгон