1992 онд Монгол улс дөрөв дэхь Үндсэн хуулиа баталснаас хойш нийт зургаан удаагийн Ерөнхийлөгчийн сонгууль болжээ.  

 

Тодруулбал Монгол Улсын Ерөнхийлөгчийн 1993 оны сонгуульд МАХН-аас "Үнэн" сонины Ерөнхий Эрхлэгч, эрдэмтэн Л.Түдэв, МҮАН, МСДН-ын эвслээс БНМАУ-ын Ерөнхийлөгч, АИХ-ын Тэргүүлэгчдийн дарга  П.Очирбат нар дэвшиж, П.Очирбат ялалт байгуулсан.

Харин Монгол улсын Ерөнхийлөгчийн 1997 оны сонгуульд МАХН-аас МАХН-ын дарга, УИХ-ын гишүүн, УИХ дахь МАХН-ын бүлгийн дарга Н.Багабанди, МҮАН, МСДН-ын "Ардчилсан Холбоо" эвслээс Монгол Улсын Ерөнхийлөгч П.Очирбат, МУНН-аас УИХ-ын гишүүн Ж.Гомбожав нар, Монгол улсын Ерөнхийлөгчийн 2001 оны сонгуульд МАХН-аас Монгол Улсын Ерөнхийлөгч Н.Багабанди, АН-аас   АН-ын ҮЗХ-ы гишүүн Р.Гончигдорж, ИЗН-аас "Монгол мэдлэг" их сургуулийн захирал, доктор Л.Дашням нар тус тус нэр дэвшиж, Н.Багабанди хоёуланд нь ялалт байгуулсан билээ.

 

Монгол Улсын Ерөнхийлөгчийн 2005 оны сонгуульд МАХН-аас УИХ-ын дарга, МАХН-ын дарга Н.Энхбаяр, АН-аас УИХ-ын гишүүн, УИХ-ын аюулгүй байдал, гадаад бодлогын байнгын хорооны дарга М.Энхсайхан, БНН-аас УИХ-ын гишүүн, БНН-ын дарга Б.Жаргасайхан, Эх Орон намаас Эх Орон намын дарга, УИХ-ын гишүүн Б.Эрдэнэбат нар дэвшин, Н.Энхбаяр Ерөнхийлөгчөөр сонгогдсон. Гэвч тэрээр дөрвөн жилийн дараа Монгол Улсын Ерөнхийлөгчийн сонгуульд АН-аас нэр дэвшин өрсөлдсөн УИХ-ын гишүүн Ц.Элбэгдоржид ялагдсан юм. Монгол улсын Ерөнхийлөгч Ц.Элбэгдорж 2013 оны сонгуульд МАН-аас нэр дэвшсэн УИХ-ын гишүүн, хөдөлмөрийн баатар Б.Бат-Эрдэнэ, МАХН-аас нэр дэвшсэн Эрүүл Мэндийн сайд Н.Удвал нартай өрсөлдөн, хоёр дахь удаагаа ялалт байгуулсан.  Sonin.mn та бүхэндээ Монгол Улсын Ерөнхийлөгчийн сонгуульд ялалт байгуулагчид хэдэн хувийн санал авч байсныг толилуулья.