АН-аас  Уул Уурхайн Сайд, УИХ-ын гишүүн асан Д.Ганхуяг, Улсын Ерөнхий Прокурор, Шадар Сайд асан Д.Дорлигжав, Монгол Улсын Баатар Э.Бат-Үүл, Ерөнхий сайд асан Р.Амаржаргал, Ерөнхий Сайд асан Н.Алтанхуяг нар Ерөнхийлөгчийн өмнөх сунгаанд оролцохоо намынхаа удирдлагад илэрхийлсэн байна. Тэдэн дээр "Гацуурт" компаний Ерөнхий Захирал Л.Чинбат нэмэгдэх магадлал бий. Харин МАХН-аас Ерөнхийлөгч асан Н.Энхбаяр нэр дэвших туйлын хүсэлтэй байгаа бөгөөд сурталчилгаагаа ч хэдийн хийгээд эхэлсэн. Хэрэв тэрээр хуулийн дагуу нэр дэвших эрхээ олж авч чадахгүй бол МАН, АН-аас мөн л нэр дэвших эрхээ олж чадаагүй улс төрчдийн нэгэнтэй тохиролцож, намаасаа нэр дэвшүүлэх хувилбар байгаа аж. Харин УИХ-д 65 суудалтай үнэмлэхүй олонхи МАН-ын хувьд Монгол Улсын Ерөнхийлөгчийн 2017 оны сонгуульд УИХ-ын дарга, МАН-ын дарга М.Энхболдыг нэр дэвшүүлэх нь тодорхой юм. Гэхдээ тус намын зарим гишүүдээс Монгол улсын Ерөнхийлөгчийн 2017 оны сонгуульд МАН-ын дарга асан, УИХ-ын гишүүн Ө.Энхтүвшинг нэр дэвшүүлэх нь зөв гэсэн саналыг МАН-ын Ерөнхий Нарийн Бичгийн дарга Д.Амарбаясгаланд илэрхийлэх болжээ.

Өөрөөр хэлбэл МАН-ын бага хурлын үеэр УИХ-ын дарга М.Энхболд, УИХ-ын гишүүн Ө.Энхтүвшин нар Монгол Улсын Ерөнхийлөгчийн сонгуульд нэр дэвших эрхийн төлөө өрсөлдөх бололтой. Ө.Энхтүвшин өмнө нь МАН-ын даргын төлөө Ерөнхий сайд асан, УИХ-ын гишүүн Сү.Батболдтой, Монгол Улсын Ерөнхийлөгчийн сонгуульд нэр дэвших эрхийн төлөө дархан аварга, Батлан Хамгаалахын Сайд, УИХ-ын гишүүн Б.Бат-Эрдэнэ, УИХ-ын гишүүн, Байгаль Орчин, Аялал Жуулчлалын Сайд Д.Оюунхорол, УИХ-ын гишүүн Д.Лүндээжанцан нартай нам дотроо өрсөлдөөд тус тус ялагдаж байсан юм.