Монгол Улсын Засгийн газар Олон улсын валютын сан/ОУВС/-тай хэлэлцээр хийснээр санхүүгийн өргөтгөсөн хөтөлбөр хэрэгжүүлэхээр урьдчилсан тохиролцоонд хүрч долоон төрлийн татварыг шат дараатайгаар нэмж байгаа билээ. 

Тухайлбал Засгийн газар өнгөрсөн сард Сүхбаатар, Замын-Үүд, Алтанбулаг, Эрээнцавын боомтуудаар импортлох 90 хүртэл октантай автобензины онцгой албан татварыг тонн тутамд 30 мянган төгрөгөөр, 90 ба түүнээс дээш октантай автобензины онцгой албан татварыг тонн тутамд 50 мянган төгрөгөөр, дизель түлшийн онцгой албан татварыг тонн тутамд 100 мянган төгрөгөөр тус тус нэмэгдүүлэн тогтоохоор шийдвэрлэж, 11 дүгээр сарын 30-ны өдрөөс мөрдөж эхэлсэн.

 Тэгвэл ирэх оны 1 дүгээр сарын 1-нээс дараах төрлийн татваруудын хувь хэмжээг нэмэгдүүлэх бөгөөд иргэд орлогоосоо хамаарч 10-25 хувийн татвар төлнө.

Тодруулбал, 1,500,000 хүртэл төгрөгийн цалинтай хүний хувь хүний орлогын татвар 10% хэвээрээ байна.

       Харин:
-    1,500,000 - 2,500,000 -   төгрөгийн цалингийн ХХОАТ 15%
-    2,500,000 - 3,500,000 -төгрөгийн цалингийн ХХОАТ  20%
-    3,500,000-aaс дээш төгрөгийн цалингийн ХХОАТ 25% болж өсөх юм.

          Мөн хувь хүний орлогын албан татварын хөнгөлөлтийг  2018 оны нэгдүгээр сарын 1-ээс 120 мянга, 2019 оноос 160 мянга, 2020 оноос 200 мянга, 2021 оноос 240 мянган төгрөг болгон, үе шаттай өсгөхөөр болсон.

Иймээс  ирэх оноос бага цалин авдаг иргэдийн татварын ачаалал буурах бол хөдөлмөрийн хөлсний доод хэмжээгээр цалин авч байгаа иргэд хувь хүний орлогын албан татвар төлөхгүй юм байна.

Үүнээс гадна ирэх сард тамхи, согтууруулах ундааны онцгой албан татварыг 10 хувиар нэмэгдүүлэх бол газар эзэмших тусгай зөвшөөрлөө бусдад худалдах, шилжүүлэхэд шинэ төрлийн татвар авч эхлэх аж.