Төмөрхуягийн Гомбосүрэн

/1980-2018/

Төмөрхуягийн Гомбосүрэн 2018 оны 08 дугаар сарын 09-ний өдөр зуурдаар таалал төгсөж бидэнд нөхөж баршгүй гарз тохиолоо.

Т.Гомбосүрэн нь 1980 онд Сэлэнгэ аймгийн Баянгол суманд төрсөн. Тэрбээр 1987 онд Сэлэнгэ аймгийн 1 дүгээр сургуульд элсэн орж, 1997 онд төгссөн. 1997-2001 онд “Сүлд” хууль зүйн дээд сургуульд суралцаж, эрх зүйч мэргэжил эзэмшсэн. Монгол Улсын Засгийн газрын Хэрэг эрхлэх газрын харьяа “Удирдлагын академи”-ийг 2016 онд Төрийн захиргааны менежментийн чиглэлээр мэргэшил дээшлүүлж, 2018 онд магистрийн зэрэг хамгаалсан байна.

Т.Гомбосүрэн нь ажил хөдөлмөрийн гараагаа Г.Занабазарын нэрэмжит Дүрслэх урлагийн музейн Хуулийн зөвлөх /2000-2001/, Сэлэнгэ аймгийн Ерөнхий боловсролын 2 дугаар сургуульд багш /2001-2002/, Сэлэнгэ аймгийнЗасаг даргын дэргэдэх Хөдөлмөр эрхлэлтийн албанд мэргэжилтэн /2001-2003/, Монголын өмгөөлөгчдийн холбооны гишүүн, “Фемида Легал консалтинг” Хууль зүйн товчоонд өмгөөлөгч /2003-2013/, 2013-2016 он хүртэл “Эм-Эл-Эс Партнерс” ХХК-ийн захирал, 2016 оноос өдийг хүртэл Зам, тээврийн хөгжлийн яамны Хяналт-шинжилгээ, үнэлгээ дотоод аудитийн газрын даргаар ажиллаж байв.

Т.Гомбосүрэн нь 18 жил хууль зүйн болон зам, тээврийн салбарт өөрийн хүч хөдөлмөр, авъяас билгээ дайчлан ажиллаж, өргөсөн тангарагтаа үнэнчээр зүтгэж зам, тээврийн салбарын хөгжилд бодитой хувь нэмэр оруулсан манай тэргүүний төрийн албан хаагчдын нэг байлаа.

Ийнхүү ажиллаж байх хугацаандаа 2005 онд Монголын Залуучуудын холбооны “Тэргүүний залуу”, 2010 онд Монголын өмгөөлөгчдийн холбооны “Өмгөөлөгчийн алдар” алтан медаль, мөн 2011 онд Монголын өмгөөлөгчдийн холбооны дээд шагнал “Монголын тэргүүний өмгөөлөгч” цол, тэмдэг, 2015 онд Хууль зүйн яамны хүндэт жуух бичиг, 2017 онд зам, тээврийн салбарын “Тэргүүний замчин хүндэт тэмдэг”-ээр тус тус шагнагдсан байна.

Хууль зүйн болон зам, тээврийн салбарын шилдэг төлөөлөгч, тэргүүний сэхээтэн, Хуульч Т.Гомбосүрэнгийн эрдэм мэдлэг, хөдөлмөрч зан, цэх шударга ноён нуруу бидний зүрх сэтгэлд үүрд мөнх дурсагдах болно.

ЗАМ, ТЭЭВРИЙН ХӨГЖЛИЙН ЯАМ