АСЕМ-ИЙН ҮЕЭР ХУДАЛДАЖ АВААД ХАДГАЛАГДАЖ БАЙСАН МАШИНУУДАА САЙД НАРТ ӨГСӨН

ЗГХЭГ-ын дарга Г.Занданшатар "Яагаад ганц сайдын машины асуудлыг яриад байгааг ойлгохгүй байна.

3.3 тэрбум төгрөгөөр шинээр жийп худалдаж авах, 15.5 тэрбум төгрөгөөр ТӨХК-ийн контор засах гэж байсныг болиулсан. 

АСЕМ-ийн үеэр үнэтэй машин худалдаж аваад зарагддаггүй, борлогддоггүй хадгалагдаж байсан машинуудаа сайд нарт өгсөн. 500 дуут дохиог цэгцэлж, хурааж авсан" гэв.

Ц.НЯМДОРЖ САЙДЫГ МАШИНАА БУЦААЖ ЗАР АА ГЭСЭН. ЗАРААД ТӨСӨВТ МӨНГИЙГ НЬ ОРУУЛНА БИЗ

Ерөнхий сайд У.Хүрэлсүх "Ц.Нямдорж сайдыг машинаа буцааж зар аа гэсэн. Зараад төсөвт мөнгийг нь оруулна биз.

Цаашид сайд нарын унаа машины асуудлыг эргэж харна гэж бодож байна. Улаанбаатар хотод жижиг оврын бензин бага иддэг машин унаж болно".

 

12:08 2018/01/29

ТЭТГЭВРИЙН НАС Ч ГЭСЭН БУЦААД ХУУЧИН ХЭЛБЭРТЭЭ ОРОХЫГ АХМАДУУД ӨӨРСДӨӨ СОНГОХ БОЛОМЖТОЙ

Сангийн сайд Ч.Хүрэлбаатар "ОУВС-тай гэрээ хэлцэл 5 дахь хоног дээрээ үргэлжилж байна. 

ХХОАТ бухимдал үүсгээд байсан. Буцаад хуучин хэлбэр рүүгээ орох шийдэлд хүрсэн. 

Тэтгэврийн нас ч гэсэн буцаад хуучин хэлбэртээ орохыг ахмадууд өөрсдөө сонгох боломжтой боллоо. 

Үүнээс гадна татвартай холбоотойгоор Татварын Ерөнхий хууль, ААНОАТ-ын хууль, ХХОАТ-ын хуулийг шинэчлэхээр бид ажиллаж байна. 

Татварын хуулийн өөрчлөлтийн гол цөм нь бизнес эрхлэгчид. Тэдэнд ойлгомжтой татварын хуультай болно" гэв.

Шадар сайд Ө.Энхтүвшин "Өвөлжилт хүнд байна. Ойрын өдрүүдэд шөнөдөө 40-50 хэм хүртэл хүйтэрч байна. 

Нийт нутгаар цасан бүрхүүлтэй байна. Хааяа нэг бараан газар байх боловч өвс зулгаах ямар ч боломжгүй байна. 

Малын хорогдол нэмэгдэж дунджаар нэг аймагт 20 мянга байна. Малаас гадна зэрлэг амьтад бээрчихсэн, идэх хоолгүй байна. Байдал амаргүй болсон нь харагдаж байна. 

Аймаг сумын өвсний нөөц дууссан байна. Нийт мал дордохоос өмнө арга хэмжээ авсан нь зөв гэж ард иргэд үзжээ".

12:01 2018/01/29

1 САРД ТӨЛСӨН ТАТВАРЫГ БУЦААЖ ОЛГОНО

Ерөнхий сайд У.Хүрэлсүх "Эцэст нь хэлэхэд ОУВС ирж хэд хоног ажиллалаа. Дөрвөн асуудлыг бид ярьсан. 

Нэгдүгээрт, эрэгтэй 60, эмэгтэй 55 наснаас өөрийн хүсэлтээр тэтгэвэрт гарах эрхийг нээж байна. Хөдөлмөрийн хүнд нөхцөлд бол эрэгтэй 55, эмэгтэй 50 наснаас тэтгэвэрт гарч болно. 

Тэтгэврийн насыг жилд 6 сараар нэмэгдэж байсныг 3 сар болголоо. 

Хоёрдугаарт, ХХОАТ-ын 4 шатлалыг зогсоолоо, 1 шатлалтай болголоо. Хуучнаараа үлдэж байна гэж ойлгож болно. 1 сард төлсөн татварыг буцааж олгоно".

10:26 2018/01/29

Төрийн ордонд Ерөнхий сайд У.Хүрэлсүх танхимын гишүүдийнхээ хамт 100 хоногийн ажлын үр дүнгийнхээ талаар хэвлэлийн бага хурал хийж байна. 

Ерөнхий сайд У.Хүрэлсүх "Эрхэм хүндэт ард иргэд ээ. Монгол Улсын эдийн засгийн нөхцөл байдал сэргэж байна гэж дүгнэж болно. 

2017 онд эдийн засгийн 4 хувийн бодит өсөлт гарлаа. Өвөг дээдсийнхээ байгуулсан эртний түүхт улсынхаа хувь заяаг бид дампуурлаар шийдэж болохгүй. Тийм учраас ОУВС-тай хамтран ажиллах сонголт хийсэн. Энэ сонголт зөв байж ээ гэдэг нь харагдаж байна. Мүүдиз агентлаг Монголын эдийн засгийг C зэрэглэлээс B зэрэглэл рүү оруулсан. Энэ нь манай эдийн засаг сайжирч байгаагийн нотолгоо. 

2017 онд төсвийн орлого 500 тэрбум төгрөгөөр давж биеллээ. Гадаад валютын нөөц 3.2 тэрбум ам.доллар болсон байна. Цаашид төгрөгийн ханш чангарах төлөв харагдаж байгаа. 

Аж үйлдвэрийн салбарын нийт үйлдвэрлэл 2017 онд 3 их наяд төгрөгөөр нэмэгдсэн. Гадаад худалдааны тэнцэл 19.7 хувиар ашигтай гарсан байна. 

Малын тоо толгой өссөн. 66.2 сая малтай болж 4.2 саяар нэмэгдсэн байна. 2017 онд бид 27.8 мянган тонн мах экспортолж 137 тэрбум төгрөгийн орлого олжээ. 

2017 онд бид Хөгжлийн банкны 580 сая ам.долларын өрийг төлж барагдууллаа. Мөн Чингис бондын 500  сая ам.долларыг төллөө. 

Зүйрлэж хэлбэл сэхээний тасагт байсан эдийн засгийг энгийн тасагт шилжүүллээ. 2018 онд бид эдийн засгийг эмнэлгээс гаргаж гэрт нь авчрах, 2019 онд ажилд нь оруулах хэрэгтэй.

Бид дан ганц уул уурхайг шүтсэнээс болж эдийн засаг түүхий эдийн бүтээгдэхүүн дагаад унадаг. Дээр нь хоёр хөрш болон олон улсын байгууллагуудад нэр хүнд унасан маань бидний зовлон. Бид оношоо тогтоосон тул эмчлэх ёстой. Зовлонгийн шалтгаанаа засаж залруулах нь Шинэ Засгийн газар бодлого. 

Ингэхийн тулд хоёр зүйл дээр анхаарч ажиллана.

Нэгдүгээрт, төрийн албаны санхүүгийн сахилга батыг тогтоох явдал чухалбайна. Юуны түрүүнд бид сахилга хариуцлагаа сайжруулах хэрэгтэй. 

Хоёрдугаарт, эдийн засгийн уналтыг зогсоох. Энэ хоёр зорилт бол Засгийн газрын гол зорилт юм.

Монгол гэдэг айл жилдээ 6 төгрөг олж 8.50 төгрөг зардаг байна. Хоёр төгрөгөө гадаад дотоодын тусламж зээлээр бүрдүүлдэг. Тиймээс төсвийн алдагдлаа багасгана. Орлогоо нэмэгдүүлж зарлагаа багасгана. 

Гадаад, дотоодын өр ширийг дарахад үндэсний үйлдвэрлэгчдийн үүрэг их байгаа гэдгийг зориуд тэмдэглэн хэлье.

Урд өмнөх Засгийн газруудын сайн сайхан хийж бүтээсэн зүйлийг нь үргэлжлүүлж, алдааг нь засна. 

Гурван тулгуурт хөгжлийн бодлогыг манай Засгийн газар боловсруулж дууслаа. Бид энэ талаар та бүхэнд дахин мэдээлэл хийнэ.

Монгол хүн эх орондоо айх аюулгүй, гэдэс цатгалан, сэтгэл амар амьдрах ёстой. Үүний төлөө Монголын төр засаг ажиллах ёстой. 

ОДОО БИД ТАВАН ТОЛГОЙГОО АШИГЛАХ ЦАГ БОЛСОН

Эрүүл биетэй, саруул ухаантай, ажилтай, орлоготой, ирээдүйтэй итгэлтэй Монгол хүн эх орондоо амьдрах ёстой. Үүнийг бүрдүүлэх нь Засгийн газрын үүрэг. 

Ингэхийн тулд ард иргэдээ эрүүл хүнс, гэр орноор хангах, боловсрол эзэмшүүлэх, ажилтай орлоготой болгож, эрүүл мэндийг нь хамгаалах ёстой.

Монгол Улс хөгжлийн замд явахдаа хос эдийн засагтай болох ёстой. Үүний нэг нь уул уурхай, нөгөө нь хөдөө аж ахуй юм.

Нефтийн хангамжийг сайжруулахын тулд бид дотооддоо нефть боловсруулах үйлдвэр байгуулна. 

20 жил ярьсан энэ ажлыг эхлүүлэх Засгийн газар бол энэ засгийн газар. 

Монгол Улс жилдээ 1.1 сая тонн шатахуун хэрэглэдэг. Үүний 98 хувийг ОХУ-аас, 2 хувийн БНСУ болон БНХАУ-аас авдаг. 

Бид тусгаар тогтносон улс. 

Хүнс, эрчим хүч, нефтиэ дотооддоо хангах ажлыг бид хийнэ.

Таван толгойг бид цогцоор нь авч үзэх ёстой. Энэ асуудлыг Засгийн газрын хуралдаанаар оруулахаар яамны сайд бэлтгэж байгаа. УИХ дээр эцсийн байдлаар шийдэгдэнэ. 

Одоо бид Таван толгойгоо ашиглах цаг болсон. Олон жил ярьлаа.

2019 оны 4 дүгээр сараас эхлээд Улаанбаатар хот руу ахуйн зориулалттай түүхий нүүрс оруулахгүй. Хууль гаргана. Батлагдана гэж би бодож байна. 

Жилийн өмнө хэллээ. Ард иргэд, ААН-үүд минь бэлтгэлээ сайн хангаарай. Ингэж чадвал Улаанбаатарын утаа дор хаяж 50 хувь багасна. 

Эхний ээлжинд нүүрс боловсруулах үйлдвэр байгуулна. 

Хоёрдугаарт эрчим хүч, цахилгаан, гаазаар хангана.

Гуравдугаарт хамгийн гол арга орон сууцжуулна".