Өнгөрсөн шөнө хордож үхсэн хоёр хүний цогцос орон сууцнаас нэмж олсноор амиа алдагсдын тоо 60 болсон тухай Эрүүл мэндийн яамны бүс нутаг хариуцсан төлөөлөгч Татьяна Шкурская өнөөдөр мэдээлсэн байна.

Хэрэг явдалтай холбогдуулан Эрхүү мужийн захирагч Сергей Левченко Мягмар гарагт захирамж гаргаж бүх дэлгүүрүүдэд спиртийн хольцтой угаалгын шингэнийг зарахыг хоригложээ.

Хэргийг шалгаж дуустал уг хориг хүчинтэй байх гэнэ. “Боярышник” буюу долоогоно хэмээх нэртэй уг угаалгын шингэнийг спиртийн найрлагатай гэсэн шалтгаанаар зарим иргэд авч уух болжээ.

Мэргэжилтнүүдийн дүгнэлтээр уг бүтээгдэхүүнд архинд байдаг этанол биш харин метанол хэмээх спиртийн төрөл байгаа нь хүмүүсийг үхэлд хүргэж байгаа гэнэ.

ОХУ даяар согтууруулах ундаа хэрэглэгчдийн 20 хувь орчим нь зориулалтын бус эм, үнэртэн, гоосайхны бүтээгдэхүүн ууж согтуурдаг тухай албаны тоо баримт байдаг ажээ.