Экс Ерөнхий сайд Н.Алтанхуягийн ахлах зөвлөх Л.Гансүхэд АТГ-аас эрүүгийн хэрэг үүсгэн шалгаж, цагдан хориод байсан. Гэсэн хэдий ч шинэчлэлийн Засгийн газар огцрохоос өмнө Л.Гансүх батлан даалтад гарсан бол түүнтэй хамт хэрэгт холбогдсон М.Тулга шийдлийн Засгийн газар байгуулагдах үед мөн батлан даалтад гарсан тухай эх сурвалжууд мэдээлж байв. Ингэснээр АН, МАН хоёр хамтарч Засгийн газар байгуулагдах үед дээрх асуудлаар тохироо хийгдэж, “Нүүрс” хөтөлбөртэй холбоотой хэрэг замхрах нь гэсэн хардлага үүсээд байсан юм. 

Гэсэн хэдий ч Тэгвэл АТГ-ын Мөрдөн шалгах хэлтсээс энэ сарын 20-ны өдөр Л.Гансүх нарт холбогдох Эрүүгийн 2014250001748 дугаар хэрэгт мөрдөн байцаалтын ажиллагаа явуулж, Монгол Улсын Эрүүгийн хуулийн тусгай ангийн 263 дугаар зvйлийн 263.2, 150 дугаар зvйлийн 150.3, 166 дугаар зүйлийн 166.2-т заасан гэмт хэрэгт яллагдагчаар татаж, яллах дүгнэлт үйлдүүлэх саналтайгаар Нийслэлийн прокурорын газарт шилжүүлсэн талаар хэвлэл мэдээллийн хэрэгслээр гарах болов. 

Ямартай ч Л.Гансүх нарын хэрэгт яллах дүгнэлт үйлдүүлэхээр болсон заалтыг сонирхоход, Эрүүгийн хуулийн 150.3.”Энэ хэргийн улмаас бусдад их буюу онц их хэмжээний хохирол учирсан бол эд хөрөнгийг хурааж, таваас дээш арван жил хүртэл хугацаагаар хорих ял шийтгэнэ”, 166.2. “Энэ гэмт хэргийн улмаас онц их хэмжээний хохирол учирсан, эсхүл албан тушаалтан албаны чиг үүрэг, бүрэн эрх, нөлөөг урвуулан ашиглаж үйлдсэн, эсхүл зохион байгуулалттай бүлэг, гэмт бүлэглэл үйлдсэн бол хөдөлмөрийн хөлсний доод хэмжээг гурван зуугаас таван зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жилээс арван хоёр жил хүртэл хугацаагаар хорих ял шийтгэнэ”, 263.2.Энэ хэргийг давтан үйлдсэн,уг хэргийн улмаас их хэмжээний хохирол, хүнд хор уршиг учирсан бол тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ” гэж тус тус заасан байдаг аж. 

    Тэгэхээр энэ хэрэг шийдэгдэвэл Л.Гансүх нар  торгох, хорих ял сонсох бололтой. Гэсэн  хэдий ч Н.Алтанхуягийн Засгийн газрын үед ЗГХЭГ-ын даргаар ажиллаж байсан Ч.Сайханбилэг одоо Ерөнхий сайдаар ажиллаж байгаа. Тиймдээ ч Н.Алтанхуягийн бодлогыг үргэлжлүүлж байгаа гэх шүүмжлэлд өртөөд байгаа энэ үед Л.Гансүхийн хэрэг шийдэгдэхгүй байх магадлал өндөр гэх хардлага нийгэмд үүсээд байна. Учир нь олон оролцогчтой хэрэг дээр нь хүчний байгууллагууд нь бүгд АН-д байгаа энэ үед хэрэг удааширна гэсэн хардлага байгаа юм. Тэгвэл АН доторх фракцын зөрчлөөс болж энэ хэрэг хурдан шийдвэрлэгдэх ч магадлалтай. Эсвэл сонгууль хүртэл сунжирч, хоорондоо тойрог суудлаар тохироо хийхийг ч үгүйсгэхгүй. Мөн Н.Алтанхуяг Ерөнхий сайдын суудлаас огцорсон ч “Алтангадас”-ын хүн засаг барьж байгаатай үүнийг холбон тайлбарлах нэгэн ч байна. 

Хэргийн талаар цухас сануулахад, өмнөх  Засгийн газар “Багануурыг ашигтай ажиллах ёстой” гэж үзсэн учраас тухайн үед ТУЗ-өөс нь тогтоож өгсөн шигшиж ангилаагүй технологийн нүүрсний хамгийн дээд ханшаас илүү үнээр буюу 27 мянга 500 төгрөгөөр авахаар болсон гэдэг. Өөрөөр хэлбэл Багануурын уурхай “Нүүрс” хөтөлбөрт нийлүүлсэн тонн нүүрс тутмаасаа долоон мянган төгрөгийн ашигтай ажилласан гэх. Гэвч “Нүүрс” хөтөлбөрийг баталсан Засгийн газрын тогтоол байхгүй болохыг АТГ-ын шалгалтаар тогтоосон. Өөрөөр хэлбэл, “Нүүрс” хөтөлбөр гэж анхнаасаа байгаагүй гэдгийг албаныхан хэлж буй гэсэн үг. 

Тэгэхээр огт байгаагүй, батлаагүй хөтөлбөрийн үр дүнд иргэд хожсон гэх үгийг Л.Гансүх нарын хүмүүс л өнгөрсөн хугацаанд ярьсныг эс тооцвол түүнийгээ баталж чадаагүй гэдэг. Ингэхээр огт байхгүй хөтөлбөрөөр мөнгө угаасан байх магадлалтай. Үндсэндээ Л.Гансүх зөвлөх анхнаасаа цаасан дээр ч бичсэн шийдвэр байхгүй хөтөлбөрийг хэрэгжүүлээд явж байсныг хуулийнхан шалгаж тогтоогоод яллалт дүгнэлт үйлдүүлэхээр болсон гэсэн үг юм. Гэвч прокурор яллах дүгнэлт хэзээ үйлдэж, шүүхэд шилжүүлэх эсэх нь тодорхойгүй байна. Ер нь энэ хэрэг хэрхэн шийдэгдэх бол гэсэн хүлээлт нийгэмд үүсээд байгаа бөгөөд ялангуяа  Ч.Сайханбилэгийн Засгийн газрын үед хэрэг нэг тийш болоосой хэмээн чих тавьж байгаа юм.