Чингис хааныг В.Белинский ингэж дүрсэлжээ.

Украины зохиолч Владимир Брониславович Белинский "Агуу байлдан дагуулагч, домогт жанжин Чингис хаан монгол хүн байгаагүй. Тэр бол түрэг угсааны хүн" гэж мэдэгдлээ. 

"Хиад, хэрэйд, найман, мэргэд бол монгол аймаг биш, харин түрэг угсааныхан. Тэдний зарим одоо хүртэл өнөөгийн Хятад улсын газар нутаг дээр амьдардаг. Гэхдээ тэд казахаар ярьдаг. Чингис хааны үед төрийн хэл нь казахтай төстэй уйгар хэл байсан юм" гэж В.Белинский ярьж байна.

Тэрбээр цааш нь "Тэмүүжиний эцэг Есүгэй баатар бол хиад аймгийнх, эх Өүлэн нь мэргэдийнх. Чингис хааны эхнэр Бөртө харин казахын хонхэрэйдийнх. Иймээс агуу байлдан дагуулагчийн бүх хүү нь турк нэртэй. Чингис хаан гэдгийг казах хэлээс орчуулбал "туяаран гэрэлтсэн хаан" гэсэн утгатай. Монголд тэр үед ч, одоо ч ийм нэр байдаггүй. Монголчууд хаанаа хунтайж гэдэг байсан" хэмээн мэдэмхийрчээ.

Түүний баталж буйгаар Чингис хааныг казахын хурлаас сонгосон бөгөөд тэнгэр шүтдэг казахууд л түүнийг оршуулсах юм байх. "Казахууд талийгаачдаа хэний ч мэдэхгүй, маш нууц газар оршуулдаг. Энэ тухай Алтан ордын Европын элч Плано Карпини бичсэн. Тэр өөрөө энэ ёслолыг харсан хүн. Гэтэл тэр үед монголчууд нас барсан хүнээ оршуулгын газар ил задгай тавьдаг уламжлалтай байсан" гэж В.Белинский бичжээ. 

В.Белинский Алтан Ордын улсыг судалж, "Ордын Москва", "Мокселийн улс" зэрэг хэдэн ном гаргасан юм байна. Тэрбээр "Оросын түүх энэ бүх баримтыг нуусан нь учиртай. Оросууд тухайн үед өөрсдийг нь казахууд эзлэн түрэмгийлж байсан гэдгийг нуухын тулд алс холын монголчуудыг байлдан дагуулагчдаар тодруулсан" гэж дүгнэжээ. 

Тэр бүү хэл В.Белинский "Ойрын үед Чингис хааныг казах гаралтай гэж албан ёсоор хүлээн зөвшөөрнө. Казахстан одоо хүртэл Орос, Хятад руу хялам хялам харсаар байна. Энэ хоёр улс өөрсдийн үзэл бодол, түүхэн домгоо алдахгүйг хичээдэг" гэж мэдэгдэв. 
 
 
 
Украины зохиолч, түүхч Владимир Брониславович Белинский