Улс төрд нөлөө бүхий этгээдүүдийн нэрс олон нийтэд ил болсон. Харин тэднээс нүүрсний гэх хэргээр ял сонссон нь УИХ-ын гишүүн асан Т.Аюурсайхан билээ.

Түүний хувьд анхан шатны шүүхээс Эрүүгийн тухай хуулийн тусгай ангийн 22.10.2-т заасны дагуу 3 жилийн хорих ял сонссон. Харин давж заалдах шатны шүүхээс Т.Аюурсайханы нийтийн албанд томилогдох эрхийг 5 жил хасаж, ялыг 2 жил 6 сар хорих ял болгон өөрчилсөн юм. Өөрөөр хэлбэл, түүний хорих ялыг 4 сараар бууруулж байв.

Тодруулбал, тэрээр анх 2024 оны нэгдүгээр сард шүүхээс ял сонсож байсан. Ингэснээр суллагдах хугацаа нь энэ оны 6 дугаар сард дуусах ёстой ч Эрүүгийн хуулийн 59 дүгээр зүйлийн 59.1 дэх хэсэгт "Шүүх цагдан хоригдсон хугацааг шүүгдэгчийн ял эдэлсэн хугацаанд оруулж тооцно" гэж заасан. Энэ дагуу, анхан шатны шүүхийн шийдвэр гарахаас өмнө цагдан хоригдсон хугацааг нь хасаж тооцож байгаа аж.

Мөн тэрбээр хоригдох хугацаандаа номын санч хийж байсан бөгөөд шагналын хоногоор шагнуулсан зэргээ тооцуулснаар маргааш суллагдахаар болжээ.

Энэ талаар ХЗДХ-ийн сайд Б.Энхбаяр "Ялын хугацаа нь дууссан хүмүүс эхнээсээ суллагдаж байна. Тухайлбал, Т.Аюурсайханы 2.6 жилийн ялын хугацаа дууссан тул маргааш суллагдана" гэлээ.