"Сөүл-1988" олимпын хүрэл медальт, Монгол Улсын Гавьяат тамирчин Нэргүйн Энхбат таалал төгсжээ.

Монголчуудын хайр хүндэтгэлийг хүлээсэн шилдэг тамирчин Нэргүйн Энхбат нь 1962 оны гуравдугаар сарын 19-нд Улаанбаатар хотод төрсөн.

1979 онд Нийслэлийн 10 жилийн 20-р дунд сургууль, 1985 онд МУИС-ийн Эдийн засгийн ангийг тус тус төгссөн.

1979 оноос Гавьяат дасгалжуулагч Д.Бандийн удирдлагад боксын спортоор хичээллэж эхэлсэн ба 1979-1989 онд Үндэсний шигшээ багийн тамирчин, 1989-1993 онд спорт сургалтын төв, үндэсний шигшээ багийн дасгалжуулагч, 1999-2001 онд МҮОХ-ны  ахлах мэргэжилтнээр ажиллаж байв. 

Тэрээр 1988 онд Сөүлийн олимпиос боксын 60 кг-ын жинд хүрэл медаль хүртсэнээр тус олимпоос Монголын багийн авсан цорын ганц медалийн эзэн болж байсан юм. 

Нэрт боксчин Нэргүйн Энхбат нь спортын карьерынхаа хугацаанд 312 тулаанд оролцож, 240 ялалт байгуулжээ.