Талийгаачтай салах ёс үйлдэхээр гэр бүл, хамаатан садан, найз нөхөд, хамт олноос нь гадна олон арван үзэгч фенүүд нь ирэв. Тэдний царай гунигтай, нүд нь нулимастай, зүрх нь эмтэрсэн тийм л дүр зураг харагдаж байв. 

Хошин урлагийн үе үеийн төлөөлөгчид, найруулагч, урлагийнхан маань цугласан байлаа. Түүнчлэн "Шинэ үе" продакшныхан бүрэн бүрэлдэхүүнээр цугласны дотор БНСУ руу эмчилгээнд яваад байсан Д.Оюунтуул ч ирсэн байв.
Тайванбаатарын Билгүүн. 2015 оны нэгдүгээр сарын 23-ны өдөр зуурдаар нас нөхчиж бидэнд нөхөж баршгүй хүнд гарз тохиолоо. Тайванбаатарын Билгүүн нь 1984 оны арванхоёрдугаар сарын 21-нд Улаанбаатар хотод мэндэлсэн юм.  2002 онд Нийслэлийн 51 дүгээр сургуулийг дүүргэж  2002-2006 онд СУИС-ыг жүжигчин мэргэжлээр төгсөж, 2005 оноос эдүгээ хүртэл Монголын хошин урлагийн  “Шинэ үе” продакшнд жүжигчнээр ажиллаж байлаа. Тэрбээр тайз дэлгэцийн 100 гаруй дүрийг чадварлагаар бүтээж, мэргэжил нэгт нөхдийнхөө тэргүүн эгнээнд байж чадсан Монголын хошин урлагийн түүчээ болсон авьяаслаг жүжигчин, ард түмний хайртай хүү нь байлаа.

Түүний авьяас билэг, уран чадварыг төр засаг өндрөөр үнэлж Монгол Улсын соёлын тэргүүний ажилтан цол тэмдгээр шагнасан билээ.

Түүний эелдэг найрсаг, хөдөлмөрч, бүтээлч, дайчин зан чанар гэгээн дүр төрх нь гэр бүл, төрөл төрөгсөд, найз нөхөд, хамтран мөр зэрэгцэн зүтгэсэн уран бүтээлч, үзэгч түмнийх нь зүрх сэтгэлд үүрд мөнх хоногшин үлдэх болно. Ослын талаар нэмэлт мэдээллийг дуулгахад "Осол гаргасан хүнд даацын авто машины жолоочийг цагдан хорьж, шалгалтын ажиллагааг эхлүүлээд байна. Урьдчилсан байдлаар тухайн машины жолоочийн 100 хувь буруутай нь тогтоогдоод байгаа юм. Харин талийгаачийн сууж явсан машиныг жолоодож явсан Өвөрмонгол залуугийн биеийн байдал сайжирч байгаа аж. Түүний уушгинд ус ихээр хуримтлагдаж, хөөсөн байдалтай байсан бол одоогоор эрүүл мэндийн байдал нь сайжирч байгаа юм байна. Харин Энхжингийн хавирга хугарч, нурууных нь яс нь цуурсан байдалтай" байгаа аж.