Сүүлийн үед нохойд хазуулах иргэдийн тоо буурахгүй байгаа гэв. Гэмтэл согог судлалын үндэсний төвийн яаралтай тусламжийн тасагт өдөрт дунджаар 5-10 хүн нохойд хазуулсан гэх шалтгаанаар хандан үйлчилгээ авч байна гэнэ.  Нохойд хазуулсан иргэдийн дийлэнхийг хүүхдүүд эзэлж байгаа аж. 

Хүүхдүүд ихэвчлэн хичээл сургуульдаа явж байхдаа нохойд хазуулсан байдаг. Нохойд хазуулсан гэх шалтгаанаар эмнэлгийн байгууллагад ханддаг 5-10 хүний хоёр нь заавал хэвтэн эмчлүүлдэг. Гудамжны золбин нохой, хашаандаа уяагүй нохой, гэртээ тэжээдэг үүлдрийн нохдын аль нь ч аюул учруулах боломжтой.

Нохой нь хүүхдийн ясыг хуга хазсан, булчин болон зөөлөн эдийг тэр чигт нь хуулсан, толгойг нь хазсан тохиолдол ч бий аж.

Нохой болон хүний хазсан шарх нь хамгийн бохир шарх. Тиймээс том хэмжээний шарх үүссэн тохиолдолд заавал хэвтэн эмчлүүлэх шаардлагатай. Насанд хүрсэн хүмүүсийн хувьд ихэвчлэн хөл болон мөчнөөсөө хазуулсан байдалтай ирдэг. Улирлын хувьд хавар, намрын улиралд нохойнд хазуулсан гэх шалтгаанаар илүү олон хүн ирдэг. Энэ нь нохойны ороо орсон үетэй холбоотой гэв.

Хэрэв нохойд хазуулсан бол хамгийн түрүүнд хазуулсан хэсгээ цэвэр зүйлээр боох хэрэгтэй. Үүний дараагаар заавал эмнэлгийн тусламж үйлчилгээ авч, галзуугийн вакцин хийлгэх шаардлагатайг анхаарууллаа.