​УИХ-ын гишүүн Н.Номтойбаяр болон Ё.Отгонбаяр нарт холбогдох хэргийн мөр­дөн байцаалт дуу­сах шатанд орж, Нийслэлийн про­курорын байгууллагад шил­жүүлсэн тухай мэдээллийг өнгөрсөн баасан гарагт Улсын мөрдөн байцаах газ­раас өгсөн.

Дээрх мэдээллээс болоод “Хууль хяналтын бай­гууллагынхан УИХ-ын гишүүдийн бүрэн эрхэд халдаж, яллах дүгнэлт үйлдүүлэхээр хэр­гийг нь прокурорын бай­гууллагад шилжүүлсэн бай­на” гэсэн шүүмжлэл гараад байгаа. Тиймээс энэ талаар албаны эх сурвалжууд ямар байр суурь баримталж байгаа талаар тодруулсан юм.

Хуулийн байгууллагын төлөөл­лүүдийн  тайлбарлаж байгаагаар “УИХ-ын гишүүний эрхзүйн байдлын тухай хуульд “УИХ-ын гишүүнийг баривчлах, гэрт нь нэгжлэх хийхээс бусад тохиолдлыг УИХ-ын гишүүний бүрэн эрхэд халдсан гэж ойлгохгүй” гэсэн заалт бий. Тиймээс УИХ-ын гишүүн Н.Номтойбаяр болон Ё.Отгонбаяр нарын гишүүний бүрэн эрхэд хууль хяналтын байгууллагынхан халдсан гэж ойлгох нь өрөөсгөл асуудал болно” хэмээсэн юм. Нөгөөтэйгүүр, УИХ-ын гишүүд мөр­дөн байцаах үйл ажиллагаанд ямар нэгэн байдлаар саад учруу­лахгүйгээр өөрсдөө сайн дураараа шалгуулж байгаа учир заавал УИХ-ын гишүүнийх нь бүрэн эрхийг түдгэлзүүлэх хүсэлт гаргах шаардлагагүй аж. УИХ-ын гишүүн Н.Номтойбаяр болон Ё.Отгонбаяр нар УИХ-ын гишүүнийхээ бүрэн эрхийг ашиглан мөрдөн байцаах үйл ажиллагаанд саад тотгор учруулсан зүйл байхгүй, Мөрдөн бай­цаалтын үйл ажиллагаанд идэвхтэй оролцож байгаа юм байна. Тиймээс тэдэнд холбогдох хэр­гийг Улсын прокурорын газраас шалгаж дуусаад яллах дүгнэлт үйлдүүлэхээр харьяаллынх нь шүүхэд шилжүүлсэн байлаа ч тэдний бүрэн эрхийг түдгэлзүүлэх тухай асуудлыг сөхөхгүй байх боломжтой юм байна. Харин шүү-хээс гэм буруутайг нь тогтоосон тохиолдолд УИХ-ын гишүүнийх нь бүрэн эрх дуусгавар болох аж.

Энэ асуудлын талаар УИХ дахь Ардын намын бүлгийн дарга Н.Энхболдоос тодруулахад “УИХ-ын гишүүд өөрсдөө хуулийн бай­гууллагынхантай тохиролцоод мөр­дөн байцаалтыг өгч байгаа тохиолдолд заавал бүрэн эрхийг нь түдгэлзүүлээд байх шаардлагагүй байх” гэсэн хариултыг өгсөн юм. 

УИХ-ын гишүүн Н.Номтой­баярт олон нийтийн газар тан­хайрсан гэдэг үндэслэлээр эрүүгийн хэрэг үүсгэн, яллах дvгнэлт үйлд­лүүлэхээр прокурорын хянал­тад шилжүүлсэн байна. Мөн түүнийг хууль бусаар баавгай агнасан байж болзошгүй гэх үндэслэлээр давхар шалгасан гэдгийг Улсын мөрдөн байцаах газраас мэдэгдсэн. УИХ-ын гишүүн Н.Номтойбаярын баавгай агнасан гэх хэрэгт хол­богдох хүмүүс зохих шийтгэлээ хүлээж, хэргийг хөөн хэлэлцэх хугацаа нь дууссан ч уг хэргийг УИХ-ын гишүүн Н.Номтойбаярт холбогдох хэрэгт хавсаргасан юм байна.

УИХ-ын гишүүн Ё.Отгонбаярыг Боловсрол, шинжлэх ухааны сай­даар ажиллаж байхдаа их хэм­жээний мөнгө угаасан гэх үндэс­лэлээр эрүүгийн хэрэгт сэжиг­лэж байгаа. Үүнд нь “Багшийн хөгжлийн ордон”-ы тенде­рийг буд­лиантуулсан, эхнэр О.Эр­дэнэсолонгынхоо дансаар гэмт хэргийн шинжтэй их хэмжээний мөнгө эр­гэлдүүлж, гуйвуулсан зэрэг асуудал багтаж байгаа юм байна. Түүний эхнэр Б.Эрдэнэсолонгын арилжаа­ны долоон банкны дан­саар дамжсан гүйлгээг хуу­лийнхан шалгаж, тодорхой хэм­жээний мөнгөн хөрөнгийг нь битүүмжилжээ.

Мөн УИХ-ын гишүүн Ё.Отгонбаяртай холбоотойгоор иргэн Ч-гийн гаргасан гомдлын дагуу мөрдөн шалгах ажиллагаа явуула­хад УИХ-ын гишүүн Ё.Отгонбаяр авлига өгөхийг бусдаас шаардсан нь холбогдох баримтуудаар нотологдсон байна. Тиймээс түүнд холбогдох авлига өгөхийг бусдаас шаардсан гэх хэргийг Улсын мөрдөн байцаах газарт шалгаж дуусаад Улсын ерөнхий прокурорт танилцуулаад байгаа аж.

УИХ-ын гишүүн Н.Номтой­баяр болон Ё.Отгонбаяр нар хууль хяналтын байгууллагынхны үгэнд орж мэдүүлгээ цагт нь өгч, мөрдөн байцаалтын үйл ажиллагаанд саад тотгор учруулахгүй байгаа ч тэдэнд холбогдох хэргүүд баримтаар нотлогдож эхэлсэн тухай Улсын мөрдөн байцаах газраас мэдэгдэж эхэллээ. Энэ нь цаанаа чухам юу хэлэх гээд байгааг цаг хугацаа харуулах биз ээ.

Р.Сарангоо