Ардын хувьсгалын 100 жилийн ойн лого бүхий 10,000 төгрөгийн мөнгөн дэвсгэрттэй холбоотой шүүмжлэл цахим орчинд өрнөөд буй. 

Мөнгөн тэмдэгтийг ямар зориулалтаар ийнхүү хэвлэж гаргасныг Монголбанкны албаны эх сурвалжаас тодрууллаа.

Энэ талаар "Түүхэн үйл явдлын дурсгалыг тохиолдуулан гүйлгээнд ашиглах боломжтой 10,000 төгрөгийн мөнгөн тэмдэгтийг 2021 онд гаргаж байсан.

Монголбанк үндэсний мөнгөн тэмдэгтийн хамгаалалтын элементүүдийг сайжруулах, нөөцийг дахин бүрдүүлэхэд анхаарч ажилладаг бөгөөд 10,000 төгрөгийн дэвсгэртийн хувьд анх 1995 онд хэвлэгдэж байсан. Үүнээс хойших хамгийн сүүлийн хэвлэлт нь 2014 онд хийгдэн, улмаар нөөцийг дахин бүрдүүлэх шаардлагатай болоод байсан.

Иймд 2021 онд нөөцийг дахин бүрдүүлэх, ингэхдээ хамгаалалтын элементийг олон улсын дэвшилтэт технологи, стандартад нийцүүлэн дурсгалын болон энгийн хувилбараар дахин хэвлэсэн байдаг" хэмээх хариултыг өгөв.

-Мөнгөн тэмдэгтийг түүхэн үйл явдлын ойд зориулан дур мэдэн хэвлэж болох уу? Энэ талаарх шүүмжлэл үүсээд буй.

-Үндсэн загварыг алдагдуулаагүй дурсгалын мөнгөн тэмдэгт хэвлэх нь Монголбанкны хуулиар зохицуулагддаг.  Төв банкны тухай хуулийн зургаадугаар зүйлийн 1-д “Монголбанк Монгол Улсын мөнгөн тэмдэгтийг гүйлгээнд гаргах онцгой эрх эдэлнэ” гэж заасан. 

Мөн хуулийн 9.1-д “Монголбанк мөнгөн тэмдэгт гүйлгээнд гаргах, гүйлгээнээс татах замаар гүйлгээнд байгаа мөнгөн тэмдэгтийн зохистой бүтцийг хангах үйл ажиллагаа явуулна. 

9.2-д “Монголбанк мөнгөн тэмдэгт үйлдвэрлэх, тээвэрлэх, хадгалах, түүний нөөцийг бий болгох, хүчин төгөлдөр эсэхийг тодорхойлох, гэмтэж муудсаныг солих, устгах ажлыг эрхэлнэ” хэмээн тус тус заасан байдаг.