Ашиг сонирхлын өөр, өөр зөрчил бүхий бүлэглэлүүдийн нэгдэл болсон энэ нам төрийн эрхийг төвлөрсөн удирдлагагүйгээр барьж байгаа нь бодит үнэн. Өөрөөр хэлбэл, АН сонгуульд ялсан биш фракциуд нь тус тусын “Бүгд найрамдах улс”-ыг байгуулсан. Эрх мэдлийн төлөө өөр хоорондоо өрсөлдөн тэмцэлддэг бага хаадын үеийг санагдуулам энэ байдал хөдөөд ч газар авчээ. 
 

Хэнтийнхэн “Аймгийн төвийнхөө нэрийг Чингис хот хэмээн өөрчилнө” гэж сүржигнэсээр байгаад санасандаа хүрсэн. Орон нутгийн 2012 оны сонгуулиар аймгийнхаа төвд цэнхэр туг хатгасан зарим аймгийн удирдлагууд ч тэдэнтэй барьцаж нутаг орныхоо нэрийг өөрчлөхдөө тулж байв.

Гэтэл Дорнод аймгийн Засаг дарга С.Ганбат бас нэгэн хачирхалтай жишиг тогтоох нь. Тэрбээр Дорнод аймгийн театрын үзвэрийн танхимын урд эгнээний суудлуудыг хурган дарга нартайгаа хамт өмчилжээ. Тэр ч атугай сандал тус бүр дээр албан тушаалынхаа нэрийг бичүүлсэн байх юм.    

МАН-ынхан орон нутгийн 2012 оны сонгуулиар Дорнодын ИТХ-д олонх болсон. Гэвч АН-ынхан тэднийг АТГ-аар айлгаж, аймгийн Засаг даргад МАН-аас нэр дэвшсэн эрхмийг намын бүлгийн хурал дээрээс баривчлуулж байсан удаатай. Ийн айлган сүрдүүлсний эцэст Дорнод аймгийн Засаг даргаар АН-ын гишүүн С.Ганбатыг томилсон билээ. Харин ямба нь дэндсэн энэ Засаг дарга иргэдийнхээ эрхэнд бүдүүлгээр халдаж, Дорнодын театрын суудлуудыг “булаасан” нь энэ. Мэдээж хэрэг, аймаг, сумын Засаг дарга нарын суудалд жирийн иргэд суух хориотой. Бүр тэдгээр суудал эзэнгүй, үзвэрийн танхимд өөр суудал байхгүй байсан ч Дорнодын иргэд “Ноёд”-ын суудал дээр заларч болохгүй. 

Ийм хөгийн үзэгдлийг Хойд Солонгос болон Ардчилсан намын гишүүн Засаг даргатай Дорнод аймгаас л харж болно. Нэг ёсондоо Хойд Солонгосын удирдагч Ким Чен Ун тэргүүтэй нөхдийн сандал дээр энгийн иргэд суух нь байтугай ойртох ч эрхгүй бол Дорнод аймгийн Засаг дарга С.Ганбатын тухлах учиртай суудал дээр иргэн Дорж сууж үзвэр үзэх эрх бас байхгүй.