Сургуулийнхаа урд, гарцан дээр хоёр сурагч машинд дайруулж нэг нь газар дээрээ нас барсан осол гарсан. Тодруулбал, 12-13 насны хоёр сурагч сургуулийнхаа урд гарцан дээр машинд дайруулж нэг нь газар дээрээ нас барж нэг нь ГССҮТ-д хүргэгдсэн талаар мэдээлсэн билээ.

Тэгвэл осолд орж ГССҮТ-д эмчлүүлж буй 13 настай охины ааваас тодруулга авлаа. Тэрбээр "Охины биеийн байдал сайнгүй байна. Хөл шагайгаараа хугарсан хагалгаа хийгдэхээр болсон. Хамар хугарсан байгаа өөр гэмтэл илрэх магадлал өндөр гэж эмч нар хэлсэн. Өчигдөр хүүхэд маань ухаан алдаад сэргээд хажуудаа байсан хүнээрээ надтай утсаар  холбогдсон. Би ажил дээрээсээ осол гарсан газарт ирэхэд хүүхэд маань гарцны хашлагаа даваад уначихсан байдалтай хэвтэж байсан. Найз нь нэлээн доор эсрэг талын автобусны буудлын машин ордог хэсэгт байсан. Тэгэхээр нэлээн хүчтэй мөргөсөн байгаа юм. Жолоочийг би сайн мэдэхгүй. Өчигдөр оройхон хоёр хүн бид нартай ирж уулзаад явсан. Би хууль хяналтын байгууллага нь шалгаад шийдэх байлгүй дээ л гэж хэлсэн.

Охин маань талийгаач охинтой цэцэрлэгээсээ найзалж, үерхсэн.  Анх найзыг нь байгаа гээд ойлгуулчихсан юм. Харин өнгөрсөн гэдгийн мэдчихээд найзынхаа зургийг нь харж орилж уйлаад сэтгэл санаа нь хүнд байна. Аав аа манай найз байгаа юм биш үү, фэйсбүүктээ байна ш дээ гээд одоог хүртэл шокноосоо гарч чадахгүй байдалтай байгаа. Өглөө хоёр сэтгэл зүйч ирье гэсэн одоогоор ирээгүй байна.  Манай хоёр хүүхдүүд багаасаа найзалсан талийгаачийн аав, ээж нь сургуульд хүргэж өгч авдаг байсан" гэлээ.