Турк улсад болсон PUBGM тоглоомын Дэлхийн Аварга Шалгаруулах Тэмцээн (ДАШТ)-д оролцсон багийнхан өнөөдөр өглөө эх орондоо ирлээ.

Тэмцээний "Grand final"-д манай улсаас гурван баг оролцож, "IHC esports" баг түрүүлсэн бол "Stalwart esports" баг хоёрдугаар байр, "4Merical vibes" баг дөрөвдүгээр байр эзэлсэн юм.

Эх орондоо ирээд буй PUBGM тоглоомын багийнхны яриаг хүргэж байна.

"IHC esports" багийн гишүүн Б.Золбоот/Zyol/: Багаараа жигд тоглосон. Энэ жилийн ДАШТ чанга өрсөлдөөнтэй байлаа. Монгол багууд сайн тоглосон. Монгол PUBGM төрөлд хүчтэй гэдгээ харууллаа.

"IHC esports" багийн гишүүн Б.Билгүүн: ДАШТ-ий өрсөлдөөн ширүүн байлаа. Дөрөв дэх жилдээ тоглож байна. Биднийг дэмжиж байсан бүх хүнд баярлалаа. Анх аав, ээж хоёр PUBGM тоглохыг дэмждэггүй байсан. 2020 онд ДАШТ-д оролцож гуравдугаар байр эзэлснээс хойш аав, ээж хоёр намайг ойлгож, дэмжиж, тусалдаг болсон. 

"IHC esports" багийн гишүүн: Б.Батбагана/Demo/ Тэмцээний үеэр Монголчууд өрсөлдөөд таарлаа. Бразил улсын баг сайн тоглож байсан. PUBGM сонирхож, хичээллэж байгаа залуустаа хичээгээрэй гэж хэлье. Анх PUBGM-аар хичээллэхэд гэрийнхэн дэмждэггүй байлаа, ойрын хоёр жилээс дэмждэг болсон.

"Stalwart esports" багийн гишүүн Б.Сүхбат: Бидний бэлтгэл энэ жил сайн байсан ч манай баг 100-аас 60%-д алдаа гаргасан, харамсалтай байна. PUBGM-аар хичээллээд дөрвөн жил болж байгаа. IHC esports баг маш сайн тоглосон, баяр хүргэе. Ирэх жилийн тэмцээний шагналын сан нэмэгдэнэ. Монголчууд илүү өрсөлдөөнтэй тоглох байх.

"Stalwart esports" багийн гишүүн Б.Нүрзэд: PUBGM анх гарснаас нь хойш 13 настайгаасаа тоглоод таван жил болж байна. 

"IHC esports" багийн тоглогч "Demo" буюу Б.Батбаганын аав н.Батхуяг: Хүү минь дэлхийн аварга болоод ирлээ, сайхан байна. Анх утсаар тоглолоо гээд загнадаг байлаа. Одоо учрыг нь олоод фэн болоод байна. Хүүдээ болон багийнханд нь баяр хүргэе.

Эцэг, эхчүүд үр хүүхдээ сайн сайхан явбал бөөн баяр байдаг болохоор и-спортоор хичээллэж байвал зөв талаас нь дэмжиж байгаарай гээд өндөр амжилт хүсье.