Одоогоос дөрвөн 7 хоногийн өмнө иргэн Д.Мөнх-Эрдэнэ ШШГЕГ-ын харьяа 413-р ангид ял эдэлж байгаад, энэ сарын эхээр 441 дүгээр нээлттэй хорих анги руу шилжсэн. Учир нь түүнийг 413 дугаар хорих ангид байхад нь сахилгын шийтгэл оноож, магадланд орох эрхийг нь хязгаарласан. Үүний улмаас өмгөөлөгч нар нь холбогдох байгууллагуудад хүсэлт гаргаж, Сэлэнгэ аймгийн Мандал сумын сум дундах Прокурорын газрын Хяналтын прокуроруудын шийдвэрээр хорих ангийн даргын тушаал, шийдвэрийг хүчингүй болгоод байв.

Үүний дараа тус хорих ангид SWAT гэсэн хувцас бүхий тусгай бэлтгэгдсэн хүмүүс очиж хоригдлуудыг дэглэсэн, тэр дунд Д.Мөнх-Эрдэнэ багтсан байдаг. Үүнийг АН-аас баг очиж уулзаад, бүлгийн хурал дээр түүнийг дэглүүлсэн нь нотлогдсон хэмээн мэдэгдсэн юм.

Тэгвэл иргэн Д.Мөнх-Эрдэнэд Монгол Улсын Ерөнхийлөгч уучлал үзүүллээ. Ингэснээр түүнийг үргэлжлүүлэн хорихгүйгээр, суллана гэсэн үг юм.