УИХ-ын чуулганаар ирэх оны төсвийг хэлэлцэж байна.

Энэ үеэр Б.Батбаатар гишүүний асуултад Барилга, хот байгуулалтын сайд Ц.Даваасүрэн хариулт өгч түүнийг "загнав". 

УИХ-ын гишүүн Б.Батбаатар: Алт, зэсийн үнэ өссөн тохиолдол түүнээс орж ирэх орлогыг юунд зарцуулах тухай бодсон зүйл байна уу. Би онцгой албан татварыг нэмэгдүүлье, ингэснээр 600 орчим тэрбум төгрөгийн нэмэлт орлого орж ирнэ. Үүнийг ээжүүдийн 50 мянган төгрөг, хүүхдийн мөнгө руу оруулъя гэдэг санал гаргасан.  

Барилга, хот байгуулалтын сайд Ц.Даваасүрэн: Би улс төрчид, гишүүддээ нэг зүйл уриалмаар байна. Гадаад оронд улс төрчид нь ажлын байр амладаг. Иргэд нь нь ажлын байр нэхдэг. Гэтэл манайд халамж.

Би тэр эхчүүдэд мөнгө өгье гэдгийг буруутгахгүй. Харин боломжтой, баян айлын хүүхдүүдэд мөнгө өгч яах гээд байгаа юм. Нүүрсний мөнгөөрөө ялгадас үйлдвэрлэж яах гээд байгаа юм.

Орж ирж байгаа мөнгөөрөө бид бүтээгдэхүүн үйлдвэрлэж, баялаг бүтээдэг болох ёстой. Гэтэл улс төрчид нь өгье гэж байхад ард түмэн авъя гэхгүй яах юм. Бид улс орныг чиглүүлэх гэж энд сууж байгаа болохоос суудлын төлөө байгаа хүмүүс биш.

Энэ янзаараа байвал улс орон хэзээ ч хөгжихгүй.