Сонсголын бэрхшээлтэй хүүхдүүдийн Эцэг эхчүүдийн нэгдсэн группээс хүүхэд бүрийг ижил тэгш эрх зүйгээр бүхий л асуудлаа шийдвэрлүүлдэг болгох асуудлаар мэдээлэл өглөө.

Хөгжлийн бэрхшээлийг хүнд, хөнгөн гэж ялгаварлан гадуурхахгүй байх зорилгоор мэдээлэл хийж буйг Эцэг, эхчүүдийн нэгдсэн группийн админ Ц.Алтансүх онцолсон юм.

Тэрбээр "Сонсголын бэрхшээлтэй хүүхдүүдийн Эцэг эхчүүдийн нэгдсэн группт 895 хүн бий. Бид тэднийг төлөөлөн хэвлэлийн бага хурал хийж байна.

Хүүхэд бүр сурч боловсрон, хөгжиж, аюулгүй орчинд амьдрах эрхтэй. Гэтэл энэ эрхийг нь хангаж чадахгүй байна. Бид хүүхдүүд шигээ чимээгүй байж чадахгүй байгаа тул дуу хоолойгоо хүргэхээр энд цугласан юм.

Хууль батлаад цаасан дээрээ үлдэх биш хүндээ хүрч үйлчилдэг байгаасай гэж гэж боддог. Бидний зүгээс өгсөн зарим хүсэлтэд хариу өгч, ажил хэрэг болгосон нь сайшаалтай. Бид мэргэжлийн түвшний хүмүүс биш ч гэсэн төрийн бодлогод туулсан амьдралынхаа туршлагаар нөлөөлж яваа хүмүүс.

Хөгжлийн бэрхшээлтэй хүүхэд бүр хөгжих ёстой. Харамсалтай нь манай улсад энэ боломжийг нь хааж байгаа нь харамсалтай.

Эрүүл мэндийн яаманд хандах зүйл байна. Бид С.Чинзориг сайдыг байхад нь удаа дараа хүсэлт тавьсан. Эрт илрүүлгийн аппаратгүй 17 аймаг бий. Аймаг болгоны нэгдсэн эмнэлгийн төрөх тасагт тэр аппаратыг авах ёстой. Нэг аппаратынх нь үнэ 10,000 ам.доллар.

Ийм аппарат байгаа цөөхөн аймаг бий ч жишээлбэл Ховд аймагт ажиллах боловсон хүчин нь байдаггүй. 

Өрхийн эмнэлгийн эмч нарын дунд сургалт явуулах шаардлагатай. Сонсголын бэрхшээл гэдгийг дунгийн суулгац юм уу эсвэл таг дүлий гэж ойлгодог хүмүүс тэнд биднийг оношлоод сууж байна. Сонсголын бэрхшээл бол дотроо тав, зургаан задардаг. 

Тэгээд эмнэлэгт эмчээ бараадаад очихоор хүнийг өмссөн зүүснээр нь ялгадаг. 

Мөн боловсролын асуудал дээр ч анхаарах зүйл их байна. Хөгжлийн бэрхшээлтэй хүүхдийн онцлогт тохирсон стандартыг боловсруулах тухай хуульд заасан байгаа. Гэтэл энэ стандартыг мөрддөг хүн байхгүй.

Сонсголгүй хүүхдэд зориулсан сурах бичиг алга.

Хөгжлийн бэрхшээлтэй хүүхдүүдийн эцэг эхчүүд нь дотроо хүнд, хөнгөн бэрхшээл гэж хуваагддаг. Яагаад эцэг эхчүүд нь бие биеийгээ ойлгож болдоггүй юм бэ? Өвчин, эмгэгийг хүнд, хөнгөнөөр нь ялгаж болдог юм уу.

Монголд 12,700 хөгжлийн бэрхшээлтэй хүүхдүүд бий. Тэдний 12 хувийг нь сонсголын бэрхшээлтэй хүүхдүүд эзэлдэг. Ойролцоогоор 1,500 орчим хүүхэд сонсголын бэрхшээлтэй.

Манай боловсролын салбарын сайд П.Наранбаяр яагаад тооцоо судалгаагүй зүйл ярьдгийг гайхаж байна. Түүний хэлснээр 700 орчим нь ерөнхий боловсролын сургуульд суралцдаг гэсэн. Гэтэл бодит байдал дээр 494 хүүхэд суралцдаг. Үүнээс тусгай сургуульд нь буюу 29 дүгээр сургуульд 269 нь суралцдаг.

Сургалтын стандарт мөрдөөгүйгээс сурлагын хоцрогдолтой. Тэр ч бүү хэл бичгээр өөрийгөө илэрхийлэх чадваргүй 12 дугаар ангиа төгсөж байгаа хүүхдүүд ч бий. Үүний бурууг нь эцэг эхчүүд үүрдэг. 

Хөгжлийн бэрхшээлтэй хүүхдийг тодорхойлдог комисс гэж байдаг. Энэ комиссын ажилд хяналт тавих хэрэгтэй байна. Комиссын хурлаар орохоор ялтантай харилцаж байгаа юм шиг хандлага их ажиглагддаг" гэж ярьсан юм.

Манай улсад дунгийн суулгацын хагалгаанд орсон 250 хүүхэд байдаг аж. Тэдний гэр бүлийн төлөөлөл "Хамгийн түрүүнд дунгийн суулгацын хагалгааны дараа бүрэн бүтэн ажиллагаатай аппараттай байж бүрэн дуу чимээгээ хүлээж аваад дараагийн хөгжилдөө анхаарах боломжтой болно. Энэ аппарат нь янз бүрийн шалтгаанаар гэмтэж, эд ангийг нь солих шаардлага гарахад хамгийн багадаа 300,000-25,000,000 хүртэлх төгрөгийн зардал гардаг.

Иймэрхүү зардлыг гаргаж чадах эцэг эх цөөхөн. Хагалгааны дараа ч олон бэрхшээл хүүхдүүдэд тулгардаг. Гэтэл асаргаа, халамжийн 600,000 төгрөг өгдөг байснаа одоо эхнээс нь хасаж байна. 

Хөгжлийн бэрхшээлтэй, асаргааных гээд гадуурхдаг зүйл жил ирэх тусам нэмэгдэж байгаа нь ажиглагддаг. 

Дунгийн суулгац хийлгээд л бүх юм нь эрүүл, саруул болчихсон юм шиг ойлголт их бий. Энэ төрлийн хагалгаанд орсон хүүхдүүдийн дархлаа мууддаг, бие нь өвдвөл аппаратаа зүүх боломжгүй байдаг юм байна. 

Энэ мэтээр олон асуудал үүсдэг" гэж онцоллоо.