Улсын Онцгой Комиссын өнөөдрийн хуралдаанаар хэлэлцсэн асуудлын талаар холбогдох албаныхан мэдээлэл хийлээ.

Нийслэлийн агаар орчны бохирдолтой тэмцэх газрын дарга Д.Мөнхбаатар “Нийслэлийн 200 орчим мянган айл өрхийн 95 мянга нь монгол гэрт, 105 мянга нь байшинд амьдарч байна. Нийт угаарын дуудлагын 80 гаруй хувь нь зуухны битүүмж алдагдсан, зуух нь эвдэрсэн шалтгаан нөхцөлтэй байдаг.

2019 онд гэр хороололд амьдарч байгаа бүх айлуудад угаарын хий мэдрэгчийг нэг удаа үнэ төлбөргүйгээр тараасан. Мөн дараа нь 2020 онд Тавантолгой түлш компаниас 60 гаруй мянган ширхгийг тараасан боловч өнөөдрийн байдлаар угаарын хий мэдрэгчтэй 60 гаруй мянган айл байна.

Манайхаас айлуудаар орж судалгаа хийгээд, угаарын хий мэдрэгч нь ажиллаж байгаа эсэхийг шалгаад явж байхад зарим настай эмээ, өвөө нар хадганд ороогоод тавьчихсан байх жишээтэй, төрийнхөө өгсөн зүйлийг нандигнана гээд. Зарим айл нь тогноос нь салгаад тавьчихсан байдаг. Яагаад салгаж байгаа юм бэ гэхээр тог их идэж байна гэдэг. Уг нь энэ төхөөрөмжийн сарын төлбөр нь 500 төгрөг л гардаг.

Энэ төхөөрөмж нь тухайн айлын угаарын хийн эрсдэлээс сэргийлэх зорилготой юм шүү гэдгийг иргэд ухамсарлах хэрэгтэй байна” гэлээ.