Боловсролын сайд, УИХ-ын гишүүн П.Наранбаярыг мэдээлэл хийх үеэр Үнэн ба зөв намын дарга А.Отгонбаатар эсэргүүцэл илэрхийлж, өндөг шидсэн билээ.

 Уг үйлдэлд нь холбогдуулан түүнийг Зөрчлийн тухай хуулийн 5.2 дугаар зүйл буюу танхайрах зөрчил үйлдсэн гэж үзэн, өнөөдөр шүүхээс долоо хоног баривчлах шийтгэл оногдуулсан байна.

Тэрбээр “Та гурван намын янханчлал дор сайд болчихоод багш нарынхаа цалинг нэмье гэж Оюун-Эрдэнэд хэлж чадахгүй байна. Улс орныг сүйрүүл гэвэл боловсролын салбарыг нь сүйрүүл гэж хэлдэг юм. 45 хоногийн курсээр багш бэлдэх гэж байгаа чинь боловсролын чанарыг нэмэгдүүлж байгаа асуудал юм уу” гээд П.Наранбаяр сайдын нүүр рүү өндөг шидсэн юм. Ингээд зогсохгүй сайдын хамт мэдээлэл хийж байсан хүмүүстэй зодолдсон түүнийг төрийн тусгай хамгаалалтын ажилтнууд зогсоосон.  

Түүний энэ үйлдэлд Сүхбаатар дүүргийн Эрүүгийн хэргийн анхан шатны шүүхээс баривчлах шийтгэл оноожээ. А.Отгонбаатарт Зөрчлийн тухай хуулийн 5.2-1.1, 5.2-1.2, 5.2-1.3, 5.2-1.4 дэх хэсгийн олон нийтийн газарт хэрүүл маргаан үүсгэж, бусдыг өдөөн хатгаж, амгалан тайван байдал алдагдуулж, олон нийтийг үл хүндэтгэж танхайрсан хэмээн албадан сургалтад хамруулж, долоо хоног баривчлах шийтгэл оноосон байна. Улмаар шүүхийн шийтгэврийн дагуу ШШГЕГ-ын харьяа Баривчлах байранд хүргэж, шийтгэлийг нь эдлүүлж эхэлжээ.