Богдхан уулын дархан цаазат газрын бүсэд байгаа орон сууцны хорооллуудаас газрын төлбөр авах асуудлаар хотын дарга Х.Нямбаатар мэдээлэл өгөв.

Тэрбээр "Өнгөрсөн тавдугаар сард Богдхан уулын дархан цаазат газарт үүссэн суурьшлын бүсийг хил хязгаараар нь Улаанбаатар хотын эдэлбэр нутагт оруулах УИХ-ын тогтоолын төслийг өргөн барьсан. Дархан цаазат газарт баригдсан хаус хорооллын иргэд, ААН-үүдэд газар эзэмших эрхийг баталгаажуулж өгөөд газрын төлбөрийг гурав дахин нэмэгдүүлсэн дүнгээр жил бүр авах тогтоолын төсөл байсан юм. Харамсалтай нь тухайн үеийн Байгаль орчны яам болон УИХ-ын Төрийн байгуулалтын байнгын хорооны хурлаар дэмжигдээгүй.

Дархан цаазат газар нь дүрмээрээ байх ёстой. Улаанбаатар хотын урд хэсэг, Богдхан уулын ам бүр хаус хорооллоор дүүрсэн, шударга, дуудлага худалдаа, сонгон шалгаруулалтаар газар өгөгдөөгүй. Авлига, албан тушаалын үр дүнгээр эдгээр суурьшлууд бий болсон. Гэтэл Улаанбаатар хотоос эрүүл мэнд, инженерийн шугам сүлжээ, боловсрол, хот нийтийн үйлчилгээг шаарддаг. Суурьшлын бүс үүсээд эдгээр стандарт, үйлчилгээг хотоос шаардаж байгаа бол газрыг баталгаажуулж, газрын төлбөр авч, үйлчилгээ үзүүлэх зарчим тавьсан юм. 

УИХ-ын хаврын чуулганаар уг асуудлыг дахин хөндөнө. Янз бүрийн байдлаар газар эзэмших эрх авсан, олон барилга барих гэж байгаа хүмүүсийн лобби орсныг тухайн үед би олон нийтийн мэдээллийн хэрэгслээр хэлсэн.

Зайсангийн, Арцатын ам болон бүх амд байгаа амины орон сууцны хорооллуудын ихэнх нь отоглох газар гэсэн нэртэй газар дээр зарим нь зочид буудал гэсэн нэртэй газар дээр баригдсан. Харахад амины орон сууцны хороолол мөртлөө отоглох газар эзэмших эрхийн гэрчилгээтэйгээр газрын төлбөрөөс зайлсхийж байгаа явдлыг таслан зогсоож, Богдхан ууланд сөөм ч газар олгохгүй байх зохицуулалтыг тогтоолын төсөлд оруулсан ч дэмжигдээгүй" гэв.