2025 оны хоёрдугаар 1-ний Бямба гарагт нийслэлийн нийтийн тээврийн үйлчилгээний төлбөр нэмэгдэх гэж байна.

Энэ талаар НТБГ-ын Захиргаа, удирдлагын хэлтсийн дарга З.Цэвээндорж “Нийтийн тээврийн үйлчилгээнд цахим төлбөрийн систем 2015 оноос хэрэгжиж эхэлсэн.

Харин 2024 оноос зорчигч тоолох системийг нэвтрүүлээд байна. Энэ хоёр системийн дагуу Нисэх, Багануур, Багахангай чиглэлээс бусад бүх чиглэлд 2025 оны хоёрдугаар сарын 1-нээс иргэд нийтийн тээврээр 1,000 төгрөгөөр үйлчлүүлнэ. Зөвхөн зориулалтын картаар буюу “Umoney”, “UBcard”-аар өдөрт хугацаа хамаарахгүй дөрвөн удаа зорчино.

Нийтийн тээврийн хэрэгслүүдэд Улаанбаатар смарт карт унших төхөөрөмж болон бүх төрлийн арилжааны банкны карт унших төхөөрөмжүүд хэвийн ажиллаж байгаа. Банкны картаар дамжин суух үйлчлэхгүй.

Дамжин суухын тулд зорчигч нийтийн тээврээс буухдаа картаа уншуулсан байх ёстой” гэв.

Өөрөөр хэлбэл Umoney карт ашиглаж, том хүн 1,000 төгрөгөөр өдөрт дөрвөн удаа зорчих бол хүүхэд 200 төгрөгөөр мөн өдөрт хугацаа хамаарахгүй дөрвөн удаа зорчино. Ингэхдээ автобуснаас буух бүрдээ картаа төхөөрөмжид заавал уншуулах шаардлагатай.

Хэрэв автобуснаас буухдаа Umoney картаа уншуулаагүй бол үнэгүй дамжин суух боломжгүй болж, дараагийн автобусанд дахин 1,000 төгрөг төлнө.

Харин арилжааны банкны картаар автобусны төлбөрөө төлөх тохиолдолд зорчилт бүрд 1,000 төгрөгөөр тооцогдоно.

Оюутнууд хөнгөлөлт эдлэхгүй, 1,000 төгрөгөөр зорчино.

Ахмад настан, хөгжлийн бэрхшээлтэй иргэд нийтийн тээврээр үнэгүй зорчих зохицуулалттай.

Уг зохицуулалт хэрэгжих гэж байгаатай холбогдуулан нийтийн тээврийн 1,100 гаруй автобусны буух хаалганд суурилуулсан карт уншигч төхөөрөмжүүдийг шалгаж, засаж дуусжээ. Хэрэв карт уншигч төхөөрөмж хэвийн биш байвал жолоочид мэдэгдэх, төхөөрөмжийг эвдэж, гэмтээхгүй байхыг НТБГ-аас зөвлөв. 

Том хүн хүүхдийн картаар зорчиж байгаа эсэхэд автобусны жолооч болон хяналтын ажилтнууд хянана.

Улаанбаатар смарт компанийн хүүхдэд зориулсан Umoney карт авахдаа төрсний гэрчилгээг үзүүлэх журамтай бөгөөд 3,600 төгрөг, насанд хүрсэн хүмүүст зориулсан карт адил үнэтэй байна.

Харин биет бус картыг “UBcard” аппликэйшн ашиглаж QR код хэлбэрээр ашиглана. Биет буюу Umoney картыг Улаанбаатар хотод суурилуулж буй 100 киоск машинаар борлуулж байгаа аж.