Улсын онцгой комиссын шуурхай хэсгийн бүрэлдэхүүн Сүхбаатар аймгийн Эрдэнэцагаан суманд ажиллаж, гал түймрийн нөхцөл байдлын талаар мэдээлэл өглөө. 

Гуравдугаар сарын 9-ний өдрөөс хойш улсын хэмжээнд 16 удаагийн түймэр бүртгэгдсэний 95 хувь нь Хэнтий, Дорнод, Сүхбаатарын нутагт гарсан байна. УОК-оос түймэр гарах эрсдэлийн талаар маш их мэдээлэл өгч байсан ч иргэдийн анхаарал болгоомжгүй үйлдлээс болж хээрийн түймэр ноцтой хэмжээнд хүрлээ гэв. 

Түймрийн улмаас улсын хэмжээнд 30 гаруй айл орон гэр, эд хөрөнгөгүй болсон. Хашаа саравчны тоог гаргаж дуусаагүй байгаа ба түймэрт өртсөн малын тоо мөн эцэслэгдэж гараагүй ч урьдчилсан байдлаар 10,000 орчим гэж тооцоолж байгаа аж. 

Цаашдаа түймэрт өртсөн малчдын төрийн үйлчилгээ, сэтгэлзүй, эрүүл мэндийн асуудалд онцгой анхаарч ажиллах хэрэгтэй байна. Түүнчлэн эдийн засгийг нь дэмжиж, малжуулах, хашаатай болгох зэргийг хэлэлцэж байна. Өнгөрсөн жилийн зудаас хойш малжихаар зээл авсан, хоршоонд нэгдсэн зэрэг асуудлууд байгаа учир малчдад сэтгэлзүйн дарамт болж байна. Гэхдээ хүний амь нас эрстээгүй учир цаашдаа бүх шатандаа хамтарч эдгээр хүмүүсийг амьдралын хэвийн нөхцөлд нь буцан орох тал дээр нь дэмжиж ажиллах нь зүйтэй гэдгийг УОК-оос онцолж дараах асуудлуудыг ярив. 

1. Ой, хээрийн түймрийн асуудалд бэлэн байдлыг бүх шатанд хийж байгаа ч түймрийн дуудлага, мэдээллээр шуурхай ажиллах нь Онгой байдлын нэгж салбаргүй орон нутгийн түвшинд хүндрэлтэй байна. Баяр амралтын өдөр таарвал шуурхай цуглах байдал дутагдалтай байна. Иймд орон нутгийн төрийн захиргааны удирдлагын хүмүүсийг өндөржүүлсэн бэлэн байдалд шилжүүлэх шаардлагатай байна. Төрийн байгууллагад жижүүрлэдэг, орлох хүнийг байлгах, мэдээлэл солилцох байдал байх хэрэгтэй байна. Эзэнгүй төрийн байгууллагыг орхиж болохгүй. 
2. Хяналт, эргүүлийн асуудал чухал байна. Тухайн орон нутгийн цагдаагийн байгууллага нь үүнд анхаарч, хөдөлгөөнийг бүртгэлжүүлэх, хяналт, хязгаарлалт тогтоох. Галын эрсдэлийн талаар сэрэмжлүүлэг түгээж ажиллах хэрэгтэй байна гэв. 

Улсаас айл өрхүүдэд гэр олгож байгаа бол аймаг, орон нутгийн зүгээс нэг сая төгрөгийн дэмжлэг үзүүлж байгаа юм байна.