“Шинэ үеийн сэтгэлгээтэй, боловсролтой, ёс зүйтэй залуус төрд гарч ирж байна” хэмээн итгэж байсан олон нийтийн хүлээлтийг дагуулсан нэгэн нэр бол Ч.Төгсдэлгэр.

Тэрээр Япон улсад хот төлөвлөлт, нийтийн тээврийн чиглэлээр мэргэжил эзэмшсэн нэгэн бөгөөд өнгөрсөн жил Нийслэлийн Ерөнхий архитектороор томилогдсон юм. Түүнийг Z үеийн төлөөлөл, боломжийн залуусын бэлгэдэл гэж хүлээн авсан олон хүн бий.

Гэвч АТГ-аас Ч.Төгсдэлгэрийг барилгын зөвшөөрөл олгох явцад гарсан архитектор даалгаврын асуудлаар шалгаж эхэлсэн нь нийгмийн итгэл найдвар руу хүйтэн ус цацах шиг болов.

Хот төлөвлөлт, барилгажилтын бүхий л үйл ажиллагаанд архитекторын даалгавар маш чухал үүрэгтэй. Харин энэ шат дамжлага авлига, ашиг сонирхлын сүлжээнд хамгийн эмзэг хэсэг байсаар ирсэн.

Ч.Төгсдэлгэрийн нэр холбогдсон хэрэг хуулийн байгууллагаар нотлогдвол “Z үе” гэх тодотгол зөвхөн нас, шинэчлэл бус, басхүү хуучин тогтолцооны өвчлөлөөс ангид бус гэдгийг харуулна.

Нийгэм шинэ үеийн дарга нараас шударга ёс, ил тод байдал, авлигагүй төрийн үйлчилгээг хүсэн хүлээж байгаа. Харин “Z үе”-ийн залуус ч хуучинсаг арга барил, хөшигний арын тохирооноос ангид байж чадахгүй бол, ээлжит итгэлийн хямрал нүүрлэх нь гарцаагүй.