Азийн холимог тулааны "One Championship" холбооноос таван тамирчин хасагдсан талаар Тайландын "Bangkok Post" сонин мэдээлжээ.

Нэгэн цагт холбооны аваргын бүс эзэмшиж байсан Даньел Келли, Мэн Бо, З.Шинэчагтага, Хей Вэй болон Антонио Маммарела нарыг бүрэлдэхүүнээс албан ёсоор хассан байна. 

Гэхдээ холбооны зүгээс энэ талаар албан тайлбар хийгээгүй гэдгийг тус сонин онцолжээ.

Өдгөө 28 настай З.Шинэчагтага энэ сарын эхээр "One Fight Night 33" тулаанаар Жанло Марк Сангаод дийлдсэн юм. 2019 онд анхны тулаанаа хийж байсан З.Шинэчагтага энэ хугацаанд 5 ялж, 4 хожигдсон үзүүлэлттэйгээр холбоог орхиж байна.

Манай тулаанч эхний дөрвөн тулаандаа ялсан ч сүүлийн таван тулааныхаа дөрөвт нь дийлдсэн байна. Хамгийн сүүлд 2023 онд БНХАУ-ын Руй Ченийг ялсан юм. Үүнээс хойш хоёр дараалан ялагджээ.