Сүхбаатар дүүргийн 9 дүгээр хорооны нутаг дэвсгэрт байр түрээслэн, НҮБ-ын 1971 оны сэтгэцэд нөлөөт бодисын тухай конвенцын жагсаалтад орсон мансууруулах үйлчилгээтэй ургамлыг хууль бусаар түүж бэлтгэн, хадгалж, хэрэглэдэг бүлэг этгээдүүдийг энэ оны 10 дугаар сарын 15-ны өдөр дайчлан баривчилж, цагдаагийн байгууллагаас шалгалтын ажиллагааг үргэлжлүүлж байна.

Хар тамхитай тэмцэх газраас Монгол Улсын Эрүүгийн хуулийн 20.7 дугаар зүйл болох Мансууруулах эм, сэтгэцэд нөлөөт бодисыг хууль бусаар ашиглах гэмт хэрэг үйлдэж шалгагдаж байхдаа мөрдөн шалгах ажиллагаанаас оргон зайлсан яллагдагч Э-г энэ оны 10 дугаар сарын 16-ны өдөр ХУД-ийн нутаг дэвсгэрээс олж тогтоон баривчилж, цагдан хорих таслан сэргийлэх арга хэмжээг авлаа.

Оргодол этгээд нь баригдах үедээ Нэгдсэн үндэсний байгууллын 1971 оны “Сэтгэцэд нөлөөт бодисын тухай конвенци”-ийн 2 дугаар жагсаалтад багтсан дельта-9 агууламжтай мансууруулах, сэтгэцэд нөлөөт ургамал болох канабисыг хууль бусаар хадгалж, давтан гэмт хэрэг үйлдсэн болохыг илрүүлжээ.

Тус этгээд нь 2015 оноос хойш Хулгайлах, дээрэмдэх гэмт хэрэгт 3 удаа, Мансууруулах эм, сэтгэцэд нөлөөт бодистой холбоотой гэмт хэрэгт 1 удаа нийт 4 удаагийн ял шийтгэл эдэлж байсан. Сүүлийн үед энэ төрлийн гэмт хэрэгт холбогдогч этгээдүүд нь урьд өмнө Монгол Улсын Эрүүгийн хуульд заасан өмчлөх эрхийн эсрэг гэмт хэрэг, хүний эрүүл мэндийн халдашгүй байдлын эсрэг гэмт хэрэг, хүний бэлгийн эрх чөлөө, халдашгүй байдлын эсрэг гэмт хэрэг зэрэг бусад төрлийн гэмт хэрэг үйлдсэн байгаа нь анхаарал татаж байна.

Цаашид гэмт хэрэгтнүүдийн зүгээс мансууруулах эм, сэтгэцэд нөлөөт бодис худалдан авч хэрэглэх, хадгалах бусдад зарж борлуулах үйлдэлдээ санхүүгийн эх үүсвэр бий болгох хэрэгцээ шаардлагаар бусад төрлийн гэмт хэрэг үйлдэж байгаа нь хар тамхины гэмт хэрэг бусад гэмт хэргийн суурь гэмт хэрэг болж байгааг харуулж байна.