16 настай охиныг онц хэрцгийгээр хөнөөсөн хэргийн мөрдөн байцаалт дуусаж, шүүхэд шилжсэн талаар бид өмнө нь мэдээлсэн билээ. Улмаар хохирогчоор тогтоогдоод байсан Э.Ган-Эрдэнэ, Э.Номин-Эрдэнэ нарыг яллагдагчаар татсан юм.

Тэгвэл оны өмнө прокурор Г.Баясгалан, Г.Янжиндулам нарт холбогдох ёс зүйн хурал товлогдоод байсан ч тэд хуралд ирээгүй талаар хохирогч охины ээж цахим хуудаснаа мэдэгдсэн билээ. 

Энэ талаар Прокурорын байгууллагаас тодруулахад “16 настай охин амиа алдсан хэрэгт хяналт тавьж байгаа прокуроруудтай холбоотой гомдлыг хурлаар хэлэлцсэн эсэхийг Прокурорын ёс зүйн зөвлөлөөс тодрууллаа. Гомдол гаргагч Г.Отгонтуяа “16 настай охин амиа алдсан хэрэгт хяналт тавьж ажилласан хяналтын прокуроруудыг ёс зүйн зөвлөлийн хуралдаанд оролцуулах хүсэлт” гаргасныг Прокурорын ёс зүйн зөвлөлийн хурлаар хэлэлцэж, хүсэлтийг хүлээн авч нэр бүхий прокуроруудыг хуралд оролцуулахаар ёс зүйн хурлыг хойшлуулсан.

Учир нь нэр бүхий прокуроруудын оролцох шүүх хурал тухайн өдөр давхацсан байжээ” гэв.