Хотын дарга Нийслэл хотынхоо өнгө үзэмжийг сайжруулахад хөдөлмөрлөдөг гэхэд болно. Түүнийг энэ хөдөлмөр хүчийг үнэлэх нь мэдээж зүй ёсны хэрэг. Гэтэл түүний захирамжийг буруугаар ашиглан "шахааны бизнес"-ийг цэцэглүүлж байна.  

Тодруулбал, Нийслэлийн Иргэдийн Төлөөлөгчдийн Хурлын Тэргүүлэгчдийн 56 дугаар тогтоолоор “Нийслэлийн нутаг дэвсгэрт түргэн үйлчилгээний цэг ажиллуулах журам”-ыг баталсан. Тэгвэл Баянзүрх дүүргийн хэсэг ТҮЦ эрхлэгчид сэтгүүлчдэд мэдээлэл хийж амин зуулгаа залгуулж байгаа хүмүүст дарамт учрууллаа хэмээн ундууцаж буйгаа илэрхийллээ. 

Ийн мэдээлэл хийх болсон шалтгаан нь тус дүүргийн удирдлагууд ТҮЦ эрхлэгчдээс Улаанбаатар хотын А болон Б бүсээс ТҮЦ-ээ гаргахыг шаардаж эхэлсэн байна. Мөн ТҮЦ эрхлэгчдийг “КИГ” компанийн үйлдвэрлэсэн 15 сая төгрөгний үнэтэй ТҮЦ-ийг заавал авахыг шаарджээ. Тэд Ардчилсан намын дарга З.Энхболд, Нийслэлийн Засаг дарга Э.Бат-Үүл нарт хүсэлт илгээж байгаагаа мөн энэ үеэр мэдэгдэв.

Уг хүсэлтэд “Баянзүрх дүүргийн Засаг дарга Д.Пүрэвдаваа, түүний орлогч Н.Батцогт нар ТҮЦ эрхлэгч бидний эрх ашгийг санаатай болон санаатай бусаар хөндөж, ядуурлыг ихэсгэж байна. Тэдний энэ үйлдэл та бүхний захиалгаар хийгдэж байна уу, эсвэл Төрийн албыг тэд мөнгө олох хэрэгсэл болгож байна уу?

Учир нь дүүргийн удирдлагаас тавьж буй шаардлагын дагуу “үлгэрчилсэн” ТҮЦ-ийг бид өөрсдөө 5-6 сая төгрөгөөр хийж, үйлчилгээ явуулах боломжтой байгаа. Гэтэл Дархан-Уул аймгийн “КИГ” компаниас 15 сая төгрөгөөр ТҮЦ авахыг тулган шаардаж байна. Хэрэв бид “КИГ” компанийн ТҮЦ-ийг худалдаж авахгүй гэвэл, бидний шинээр хийж бүтээсэн ТҮЦ-ийг хурааж авна, нураана хэмээн дарамт үзүүлэх боллоо.

Энэ 15 сая төгрөг хэний халаасанд орох бол? Өнөөдөр 15 сая төгрөгөөр ТҮЦ авч ажиллуулах хүн хэр олон бол?гэж та бүхнээс асуумаар байна. Өнөөдөр Монгол улсын Ерөнхийлөгч, Ерөнхий сайд нь Жижиг дунд үйлдвэрлэгчдийг дэмжие гэж уриалж байхад, Баянзүрх дүүргийн удирдлагууд яагаад ийм асуудал гаргаад байгааг бид ойлгохгүй байна. Бид хэнээс ч хоол гуйгаагүй, хэний ч мөнгийг луйвардаагүй. Баянзүрх дүүргийн Засаг дарга Д.Пүрэвдаваа, түүний орлогч Н.Батцогт нар анх ажлаа авах үедээ ийм баян байгаагүй. Одоо тэд шиг баян хүн Баянзүрх дүүрэгт алга. Ард түмнээ мөлжиж, өөрсдөө баяжих нь ардчилсан нийгэм мөн үү. Энэ асуудалд анхаарлаа хандуулахыг хүсэж байна” гэжээ.

Баянзүрх дүүргийн иргэн н.Дэлгэрмаа “Би Баянзүрх дүүрэгт 15 жил ТҮЦ ажиллуулж байна. Өнгөрсөн 2014 оны долоодугаар сард би 8 хувийн зээлд орсон. Гэтэл Баянзүрх дүүргийн удирдлагууд миний амь зуулгаас салгачихлаа. Би хоёр жаахан хүүхэдтэй хүн. Өөрөөр хэлбэл, Баянзүрх дүүргийн удирдлагууд миний ТҮЦ-ийг хотын А болон Б зэрэглэлийн бүсээс ТҮЦ-ээ зайлуул гэсэн. Би амьдралаа дээшлүүлэх гэж зээл авсан, энэ сарын 20-нд чанаргүй зээлийн ангилалд орох гэж байна. Үндэсний цэцэрлэгт хүрээлэнд байгаа ногоон ТҮЦ-ийг та бүхэн хараарай, ямар арын хаалгатай хүмүүс уг ТҮЦ-ийг түрээслээд байгаа юм бэ. Би энэ асуудлыг АТГ-т өгнө” хэмээн өөрийн байр сууриа илэрхийлсэн юм.

Харин Баянзүрх дүүргийн иргэн Б.Дамба “Нийслэлийн Засаг дарга Э.Бат-Үүл 2013 онд “Нийслэлийн нутаг дэвсгэрт Түргэн үйлчилгээний цэг ажиллуулах журам”-ыг хэлэлцэн баталсан. Энэ дагуу ТҮЦ нь галын аюулгүй ажиллагааг бүрэн хангасан байхаас гадна, хяналтын камер галын анхан шатны багаж хэрэгсэлтэй байхаар тогтсон. Мөн эрүүл ахуйн стандартыг хангуулах зорилгоор худалдагчийн ариун цэврийн өрөөг зөөврийн бие засах суултуураар тоноглож, бохирыг урсгах, зөөврийн цэвэр усны нөөцтэй, бохирын үнэр дарах, халдваргүйтгэх бодисын хүрэлцээтэй нөөцтэй байхаар журамд заасан билээ. Бид энэ дагуу өөрсдийн хөрөнгөөр ТҮЦ барьсан. Гэтэл БЗД-ийн Засаг ноён Д.Пүрэвдаваа бидний ТҮЦ-ийг шаардлага хангахгүй гэж үзээд, биднийг хөөж туугаад байгаа. Бидний хийлгэсэн ТҮЦ-ийг мэргэжлийн хяналтын байгууллагаар шалгуулж болно шүү дээ. Заавал “КИГ” компанийн ТҮЦ-ийн ав гэсэн. Цаана нь хувийн ашиг сонирхол байна гэж үзэж байна. Цаашид ийм байдалтай байвал, Баянзүрх дүүргийн удирдлагуудыг АТГ-т шалгуулах болно" гэсэн юм. 

Ийнхүү иргэд өөрсдийнхөө хөрөнгөөр цэвэр цэмцгэр ТҮЦ барьчихаад ажиллуулж байгаа хүмүүсийг заавал 15 саяын ТҮЦ ав хэмээж байгаа нь хачирхалтай.