Өнгөрсөн арванхоёрдугаар сарын 21-22-нд шилих шөнө орцонд хүүхдээ хаяж явсан хэрэг гарсан. Тодруулбал, Сүхбаатар дүүргийн цагдаагийн хэлтэст тус дүүргийн долдугаар хорооны нутаг дэвсгэрт байрлах 10 дугаар байрны орцонд хүүхэд орхисон байна гэсэн дуудлага мэдээлэл ирсэн байна. Мэдээллийн дагуу Сүхбаатар дүүргийн цагдаагийн нэгдүгээр хэлтсээс шалгалтын ажиллагаа явуулж, орцонд хүүхдээ хаяж явсан эхийг эрэн сурвалжлах ажиллагааг эхлүүлж, охиныг эмнэлэгт хүргэсэн.

Охины хоёр уушги нь битүү хатгаатай, витамины хэт дутагдалд орсон, нүдэнд нь цагаа унасан, хөлд ороогүй байсан юм. Сайхан сэтгэлтэй эхчүүд, эмч нар шаардлагатай бүхий л арга хэмжээг авсан боловч Д.Н охин 2016 оны 01-р сарын 13-ны өдөр өвчнөө дийлэлгүй нас барсан. Харин охиноо харанхуй орцонд хаясан эх нь эрхэлсэн тодорхой ажилгүй 22 настай Д гэгч бөгөөд хүүхдээ тэжээж чадахгүй болохоор орхисон гэдгээ тайлбарлаж байсан юм. Түүнийг охин нь нас барахаас өмнө уулзуулсан байдаг.

Охиноо орхиж явсан Д гэгчид охиныг хөдөөлүүлэх мөнгө байгаагүй. Тиймээс охинд тусалж байсан ээжүүд “Эвээлтэй сэтгэл” группийн гишүүд эрвийх дэрвийхээрээ зүтгэж, Буян компанийнхан талийгаач охины буяны ажлыг үнэ төлбөргүй хийж өгсөн байна. “Эвээлтэй сэтгэл” группийн ээжүүд талийгаач охины 21 хоног болон 49 хоногоор группийнхээ хүрээнд мөнгө цуглуулан хүүхэд багачуудыг баярлуулж охины араас буян үйлдсэн.

Хүүхдээ оpхин явсан эхийг, эгчийнх нь хамт энэ сарын 12-ны өдөр шүүнэ. Тэднийг Эрүүгийн хуулийн 117.2-т зааснаар яллах дүгнэлттэйгээр шүүх юм. Хэрвээ шүүх тэднийг буруутай гэж үзвэл таван жил хүртэл хугацаагаар хорих ялаар шийтгэх юм байна.

Элээний сүүдрээс ч харамлан өсгөх гэж бурханаас хүлээж авсан ээж нь, эргэх хорвоогийн харгис хатуугаас нөмөрлөн хамгаалах учиртай эцэг нь хүүхдийн эрлэг болсон энэ цагт бид л хүчирхийлэлд өртөхөөс сэргийлж чадна. Тэгсэн цагт төр нь ирээдүйгээ хамгаалалтад авах учиртай.

Зарим нэгэнд нь хүсээд ч ирдэггүй хорвоогийн баяр баясгалан, аз жаргалын дээд, хайрын ундарга болсон хүүхдээ орхисон тохиолдол дахиж битгий гараасай. Хүүхэд хайранд өлгийдүүлж, муу муухай бүхнээс хамгаалуулах ёстой болохоос орхигдож, гадуурхагдах ёсгүй.

А.Баярмаа