Нэр дэвшигч Д.Оюунхоролын нэр хүндэд халдсан асуудлаар МАН-ын төв штабаас мэдэгдэл гаргалаа

Уг мэдэгдлийг бүрэн эхээр нь хүргэж байна.

Сонгуулийн тухай хуулийн 70 дугаар зүйлийн 70.1-д “Ээлжит сонгуулийн жил эхэлснээс хойш санал хурааж дуустал аливаа этгээд сонгогчдын саналыг татах зорилгоор дараах үйлдэл, үйл ажиллагаа явуулахыг хориглоно” гэж тодорхойлоод уг хуулийн 70.1.6-д “...бусдыг гүтгэн доромжлох, хуурамч мэдээлэл тараах” мөн зүйлийн 70.5.13-т “сонгуулийн сурталчилгааны явцад бусдыг гүтгэх, доромжлох, гутаах, хуурамч мэдээ, мэдээллийг төрөл бүрийн хэлбэрээр тараах-ыг хориглосон.

Гэтэл УИХ-ын сонгуулийн 49 дүгээр тойрогт Монгол Ардын Намаас нэр дэвшигч Дуламсүрэнгийн Оюунхоролын нэр хүндэд халдсан, бүдүүлгээр гүтгэсэн, иргэд сонгогчдын санал өгөх ажиллагааг санаатайгаар будилуулах гэсэн ноцтой үйлдлийг өрсөлдөгч талаас гаргалаа.Тодруулбал, тус тойргийн иргэд, сонгогчдын гар утсанд 9900000...гэсэн дугаараас “УИХ-ын сонгуулийн 49 дүгээр тойрогт Монгол Ардын Намаас нэр дэвшигч Д. Оюунхоролын мөнгө тараасан үйлдлийг цагдаад болон шүүх тогтоож шийдвэрээ гаргасан байна” гэсэн худал мэдээг мессежээр ирүүлсэн байна. Мөн сонгогчдын дунд нэр дэвшигч Д.Оюунхоролыг нэр дэвшигчдийн жагсаалтаас хассан гэх худал цуурхалыг тараажээ.

Нэр дэвшигч Д.Оюунхорол нь иргэдэд мөнгө, эд зүйл тараагаагүй бөгөөд шүүх, цагдаагийн ямар ч шийдвэр гараагүй байна. Дээрх хууль бус ажиллагаатай холбоотойгоор нэр дэвшигчийн сонгуулийн штабаас 2016 оны 6 дугаар сарын 28-ны өдөр Сонгуулийн ерөнхий хорооноос тайлбар хүссэн албан бичгийг явуулсан. Албан бичгийн дагуу Сонгуулийн ерөнхий хороо 2016 оны 06 дугаар сарын 28-ны өдөр 432 тоот албан бичгээр Д.Оюунхоролын нэрийг нэрсийн жагсаалтаас хасаагүй гэж албан ёсоор мэдэгдсэн болно.

Иймд Сонгуулийн ерөнхий хорооноос Монгол Ардын Намаас нэр дэвшигч Д. Оюунхоролыг УИХ-ын сонгуульд нэр дэвшигчдийн нэрсийн жагсаалтаас хасаагүй болохыг олон нийтэд шуурхай мэдээлж, иргэдийн сонгох, сонгогдох эрхээ хэрэгжүүлэхэд хууль бусаар нөлөөлж байгаа үйлдлийг таслан зогсоох, улмаар тус тойрог дахь сонгуулийн үйл ажиллагааг хууль тогтоомжийн дагуу, шударгаар явуулах талаар холбогдох арга хэмжээг авч хэрэгжүүлэхийг хариуцлагатайгаар мэдэгдэж байна.Дээрх хууль бус үйлдлийн талаар хууль хяналтын байгууллагад хандсан болно.

МОНГОЛ АРДЫН НАМЫН СОНГУУЛИЙН ТӨВ ШТАБ