“Цензургүй яриа” нэвтрүүлгийн өчигдрийн дугаад хошууч генерал А.Ганбат оролцлоо. Түүний ярианы гол агуулга цэргүүд байгуулалтад оролцох ёстой гэсэн Монгол Улсын Ерөнхийлөгч Х.Баттулгын бодлогыг ухуулан ярьж байна. Энэ нь түүнийг ЗХЖШ-т ирэхийн дохио гэж армийнхан жиг жуг гэлцэж эхэллээ.

Тэр өөрөө ч ийм сонирхолтой гэдгээ аль 2011 оноос хойш илэрхийлж ирсэн гэх юм билээ. Монголын армитай холбоотой өөр нэг мэдээлэл гэвэл Батлан хамгаалах аж үйлдвэрийн дарга, хурандаа Б.Коля ойрдоо БХЯ-наар эргэлдэх болсон сурагтай. Саяхан хэвлэлүүдээр оросуудыг шантаажилсан асуудлаар шуугиан тарьсан мань эр шинэ сайддаа танигдах гэж ойр ойрхон яаманд жижүүрлэн суугаа юм байх.

Мань эр шинэ сайдынхаа ая талыг засч Бөртэ үйлдвэрийн даргаар очих гэсэн ч чадаагүй гэх. Дархан аварга Б.Бат-Эрдэнийн томилсон салбартаа уусдаггүй нөхөр гэвэл Зэвсэгт хүчний жанжин штабын харьяа “Соёмбо” сонины эрхлэгч, эрүү хочит яруу найрагч Ч.Баяржаргал. УИХ-ын гишүүн Х.Мөнхцэцэгийн дэмжлэгээр УИХ-ын гишүүн, дархан аварга Бат-Эрдэнийг Батлан хамгаалахын сайд байх үед нь Зэвсэгт хүчний харьяа “Соёмбо” сонинд томилогджээ. Харамсалтай нь мань эр томилогдсноосоо хойш Зэвсэгт хүчнийг хаа сайгүй муулж, өөрт нь цэргийн цол өгөөгүй цэргийн удирдлагуудыг нь муулж өөлөөд явах болжээ.

Саяхан гэхэд цэргийг ингэж удирддаггүй юм гэж цэргийн нэг даргатай барьцалдаж авсан гэнэ. Зэвсэгт хүчний мэдээ, мэдээллийг түгээх үүрэгтэй  80 гаруй жилийн түүхтэй “Соёмбо” сонинг хүртэл  уран зохиолын сонин болгосонд зэвсэгт хүчнийхэн дургүйцэж байгаагаа илэрхийлэхэд өөдөөс нь хэрүүл хийж, над шиг сэтгүүлчийг хаанаас ч олохгүй хэмээн хашгирчээ. 

А.Баярмаа