Хүн бүр Цэндийн Дамдинсүрэн шиг бичээч байх албагүй ч зохих төвшинд зөв найруулан бичих чадвартай байх ёстой. Утга төгөлдөр найруулан бичих нь бидний эх хэлний чадварыг харуулахаас гадна соёлын төвшинг илтгэдэг.

Өөрөөр хэлбэл, үг хэллэгийг оновчтой сонгон товч тодорхой, ойлгомжтой найруулан бичих нь бичгийн уран чадвар .”Үрсүүд, охидууд, багийн найз гэх мэт алдаатай бичиж буй иргэдийг монгол хэлний дамжаанд суулгая” хэмээн уриалдаг сэтгүүл зүйн салбарын төлөөлөгчид утга найруулгын алдаатай бичих нь элбэг болжээ. Олон нийт өдөр тутамдаа хүлээн авч  буй мэдээлэл  нь өнөөгийн нийгмийн толь болдог учраас соёлын төвшин,хэлний боловсролыг төгөлдөржүүлэхэд бүх шатны сургуулийн байгш, эрдэмтэн судлаачаас гадна хэвлэл мэдээллийн ажилтан, сурвалжлагч, сэтгүүлчид хариуцлагатай үүрэг гүйцэтгэдэг. Саяхан нэгэн хэвлэлээс “Үүрийн цолмон шиг цөөрч буй ахмад багш нараа хайрлая гэсэн сайхан өгүүлбэрийг уншаад хоёрыг эргэцүүлж суулаа. Ахмад настнаа хайрлах нь зүйтэй. Тэд цөөрч буй нь үнэн. Гагцхүү “Үүрийн цолмон шиг цөөрөх” гэж зүйрлэсэн нь оновчтой болсонгүй. Үүрийн цолмон  од буюу Сугар гараг  ганцхан. Олшрох ч үгүй, цөөрөх ч үгүй. Хүн  бүр уран яруу, утга гүн, хошин хоржоонтой,хөнгөн гэгэлгэн бичих авьяасгүй байж болно. Энэ бол дэгжин, чамин үгээр өгүүлбэрээ “гоёх”Ю гээд утгын алдаа гаргах нь элбэг болсны жишээ юм.Ийнхүү хэт чамирхсанаас  үг  буруу  сонгох алдаа гаргах нь түгээмэл. Найруулан бичихдээ хэт чамирхах нь эх хэлээ мохоох нэгэн шалтгаан болж байна.Соёлын дархлааг сахин хамгаалж буй сэтгүүлчдэдээ уран зохиол, эх хэлнийхээ хэм хэмжээг гажуудуулахгүй байхыг уриалъя

Х.Заяа

Эх сурвалж: "Монголын үнэн" сонин