“Гэр хороолол хөдөлгөөн” ТББ-аас өчигдөр /2018.05.17/ Д.Сүхбаатарын талбайд майхантай цуглааныг байгуулахдаа хууль тогтоомж зөрчсөн тул цагдаагийн байгууллагаас албадан тараасан байна. Энэ тухай Цагдаагийн ерөнхий газрын Хэвэл мэдээллийн төвийн дарга, цагдаагийн дэд хурандаа Б.Баатархүү сэтгүүлчдэд мэдээлэл өглөө.

  2018 оны 05 дугаар сарын 17-ны 11:30 цагаас эхлэн Сүхбаатарын талбайд “Гэр хороолол хөдөлгөөн” төрийн бус байгууллагаас бүртгэлгүй майхантай цуглааныг зохион байгуулсан нь Монгол Улсын Жагсаал, цуглаан хийх журмын тухай хуулийн 11 дүгээр зүйлийн 11.8 дахь хэсэгт заасан “Нийслэл Улаанбаатар хотын Сүхбаатарын талбайд жагсаал, цуглаан зохион байгуулахдаа гэр, майхан, бусад түр орогнох байр барих болон хоноглохгүй байх, түүнчлэн бүх төрлийн тээврийн хэрэгсэл, ердийн хөсөг нэвтрүүлэхгүй байх” гэсэн заалтыг зөрчсөн байх тул хууль бус жагсаал, цуглааныг нэн даруй зогсоож, цагдаагийн алба хаагчдын хууль ёсны шаардлагыг биелүүлэх тухай “Гэр хороолол хөдөлгөөн” төрийн бус байгууллагын тэргүүн Б.Батсүхэд Сүхбаатар дүүрэг дэх цагдаагийн нэгдүгээр хэлтсийн 30ө/3152 албан шаардлагыг хүлээлгэн өгсөн. Мөн нийтийн хэв журам хамгаалах тасгийн дарга, ахлах байцаагч нараас 6 удаа амаар уг хууль бус үйл ажиллагаагаа зогсоох тухай шаардлага тавьсан боловч шаардлагыг хүлээн аваагүй байна.

Мөн Сүхбаатар дүүргийн Засаг даргын Тамгын газрын Хуулийн тасгийн дарга Д.Булгамаагаас цуглаан зохион байгуулагчдад “Жагсаал, цуглаан хийх журмын тухай хуулийн 9 дүгээр зүйлийн 9.1 дэх хэсэг, 11 дүгээр зүйлийн 11.3.8 дахь заалтуудыг тус тус зөрчин бүртгэлгүй цуглаан хийж байгаа тул Жагсаал, цуглаан хийх журмын тухай хуулийн 14 дүгээр зүйлийн 14.2 дахь хэсгийг үндэслэн 2 цагийн дотор зохион байгуулж буй хууль бус үйлдлээ зогсоохыг шаардаж байна” гэсэн Сүхбаатар дүүргийн Засаг даргын 2018 оны 05 дугаар сарын 17-ны 1/1242 тоот шаардлагыг “Гэр хороолол хөдөлгөөн” төрийн бус байгууллагын тэргүүн Б.Батсүхэд хүлээлгэн өгсөн боловч тарахгүй гэдгээ мэдэгджээ.

Улмаар 21:50 цагт “Гэр хороолол хөдөлгөөн” төрийн бус байгууллагын тэргүүн Б.Батсүхэд Сүхбаатар дүүргийн Засаг даргын Тамгын газраас өгсөн шаардлагын хугацаа дууссан тул бүртгэлгүй цуглааны үйл ажиллагаагаа сайн дураараа тараах талаар анхааруулсан боловч шаардлагыг биелүүлээгүй тиймээс Сүхбаатар дүүргийн Засаг даргын 2018 оны 05 дугаар сарын 17-ны “Жагсаал, цуглааныг албадан тараах тухай” А/173 дугаар захирамжийг хэрэгжүүлэх зорилгоор хууль зөрчсөн цуглааныг цагдаагийн байгууллагаас албадан тараах ажиллагааг зохион байгуулсан” гэж мэдээлэв.