Нийслэлийн мэргэжлийн хяналтын газраас өнгөрсөн гуравдугаар сарын 12-наас дөрөвдүгээр сарын 20 хүртэл нийслэлийн нутаг дэвсгэрт үйл ажиллагаа явуулж буй 14 саун, 7 халуун ус, 10 усан бассейнд шалгалт хийжээ.

Сауны газруудаас 14.2 хувь нь бага, 85.7 хувь нь дунд эрсдэлтэй, усан бассейн, чийрэгжүүлэлтийн усан сангаас 50 хувь нь бага эрсдэлтэй, 50 хувь нь дунд эрсдэлтэй, халуун усны газруудаас 85.7 хувь нь дунд, 14.2 хувь нь их эрсдэлтэй гэж үнэлэгджээ.

Илэрсэн нийтлэг зөрчлийн хувьд, дотоодын хяналт тавих журам тогтоож, мөрдөж ажилладаггүй байна. Усан бассейн, спорт сургалтын төвүүд дотоодын хяналтын лабораторигүй, сауны газруудын барилга байгууламжууд нь батлагдсан зураг төслөөр баригдаагүй, барилгын суурин давхрын хийц өөрчилж, үйл ажиллагаа явуулж байв. Үйлчилгээний ажилчид эрүүл мэндийн урьдчилан сэргийлэх үзлэг шинжилгээнд хамрагдаагүй жилд нэг удаа хамрагдсан үзлэгийн дэвтэртэй боловч, эмчийн тамга тэмдэг, гарын үсэг зөрөөтэй хуурамч бичиг баримттай нь үйлчлүүлэгч нарын дунд арьсны болон амьсгалын замын халдварт өвчнийг тархаах нөхцлийг бүрдүүлж байгаа юм.

Харин цэвэрлэгээний байдалд лабораторийн шинжилгээ хийхэд БГД-ийн “Усан спорт сургалтын төв”, “Түмэн занги” ХХК-ийн “Говь” сауны усан бассейн, Максложинг ХХК-ийн “Рамада саун”-ы чийрэгжүүлэх усан сан, МЧБС ХХК-ийн “Соёл саун”-ы чийрэгжүүлэх сангийн ус нянгийн бохирдолтой гарчээ.

“Нарантуул шейл ойл” ХХК-ийн бассейн, “Халиун төгөл” ХХК-ийн бассейны ус нь үлдэгдэл хлор бага гарсан. Усан бассейн, чийрэгжүүлэх усан сангийн усанд гэдэсний бүлгийн савханцар илэрсэн нь тухай газрын ариун цэвэр, халдвар хамгааллын дэглэм хангалтгүй, үлдэгдэл хлор зөвшөөрөгдөх дээд хэмжээнээс бага гарсан нь бассейны усыг байнгын эргэлтэд байлгах шахуурга, шүүлтүүр болон халдваргүйжүүлэлтийн тоног төхөөрөмжийн эргэлт, усан сангийн ус бүрэн солигдох хугацаа шаардлага хангахгүй зэрэгтэй шууд холбоотой байв.

Саун, халуун усны ажлын байрны эд хогшил, тоног төхөөрөмж, зөөлөн эдлэл, үйлчилгээнд хэрэглэгдэж буй шаахай, амралтын хувцас, гар нүүрийн алчуур зэргээс нийт 14 газраас 99 арчдас авсан байна. Мөн 12 газрын 79 арчдасны 15 буюу 18.9 хувьд гэдэсний бүлгийн савханцар E.Coli илэрсэн нь энэ газруудын цэвэрлэгээ, халдвар хамгааллын дэглэм шаардлага хангаагүйг харуулж байв. Мөн уг газруудад эмнэлгийн анхан шатны тусламж үзүүлэх эмийн сангийн бүрдүүлэлт муу байжээ.

Харин 19 газрын үйлчилгээний ажиллагсад нь хувийн дугаар бүхий энгэрийн тэмдэггүй, үйлчилгээний онцлогт тохирсон зориулалтын ажлын хувцасгүй, зөөлөн эдлэл угаах угаалгын өрөө нь эрүүл ахуйн урсгал буруу, цэвэр бохир хэрэглэл нэг дор байрласан, өрөөний хана, тааз мөөгөнцөрдсөн. Саунд орж болохгүй өвчнүүдийн заалтыг ил бичиж байрлуулаагүй байв.

Иймд зөрчил гаргасан 10 аж ахуй нэгжид улсын байцаагчийн албан шаардлага, есөн аж ахуй нэгжид албан даалгавар, 12 аж ахуйн нэгж, хоёр иргэнд нийт 5 сая 500 мянган төгрөгийн шийтгэл ногдуулсан байна.