УИХ-аас баталсан 38 дугаар тогтоолын дагуу амьжиргааны түвшний 1-10 дугаар бүлэгт орсон айл өрхийн хүүхдэд сар бүр 20 мянган төгрөг бэлнээр олгохоор, уг бүлэгт хамаарахгүй бол хүүхдийн мөнгийг хадгаламж хэлбэрээр байршуулж, 2019 оноос бэлнээр авч болохоор заасан. Хүүхдийн мөнгийг ялгавартай олгох нь хууль зөрчсөн үйлдэл юм.

Хүүхдийн мөнгө авах боломжтой хүүхдүүдийн жагсаалтад багтаж чадаагүй 10 настай Л.Бранижил охин эрх баригчдад хандан сар бүр захидал бичдэг гэнэ.

Тэрбээр хэлэхдээ “Намайг Л.Бранижил гэдэг. Би 5 настайдаа хагас өнчин болсон, 8 настайдаа бүтэн өнчин болсон. Надад хүүхдийн мөнгө сар бүр ирдэггүй. Тэгээд би сар бүр захидал явуулдаг, гэхдээ миний захидлын нэгийг ч уншиж байгаагүй. Хүн болгоныг битгий ялгаварлаж харьцаасай гэж бичдэг. Тэгээд миний захидлыг нэг ч гишүүн олж уншдаггүй гэдэгт би маш их харамсаж байна” хэмээн нулимс дуслуулан ярьжээ. Энэ мөнгө хүүхэд бүрд хүрч чадахгүй байгаад ард иргэд ихэд шүүмжлэлтэй ханддаг.