Одоогоос яг нэг жилийн өмнө Италийн Милан хотноо чуулсан АСЕМ-ын Дээд түвшний 10-р уулзалтаар 2016 онд АСЕМ-ыг даргалах, 11 дэх удаагийн Дээд түвшний уулзалтыг Улаанбаатар хотноо зохион байгуулах эрхийг Монгол Улсад авсан тухай Ерөнхийлөгч Ц.Элбэгдорж сүр дуулиантайгаар зарлаж, Монголчуудыг дэлхийд таниулах ховор сайхан боломж бүрдлээ хэмээн эрх баригчид хөөрцөглөж, санхүүгийн хямралд нэрвэгдэж, хаа сайгүй мөнгөний хомсдолд ороод байгаа энэ үед хамаг хөрөнгөө АCEM нэрээр эрх баригчид тарааж байгаа. 

Хамгийн гол нь дэлхийн нэр хүндтэй энэ том арга хэмжээний нэр барьсан луйварчид татварын мөнгө рүү гараа дүрж, улсын төсвөөс хэдэн зуугаар тоологдох мөнгө нэхэж байгаа. Гэтэл бүр сүүлдээ Дархан цаазат Богдхан уулын Төрийн тусгай хамгаалалттай газраас АСЕМ-ын нэрээр хумсалсан гэдэг мэдээлэл олны анхаарлыг татаж эхэллээ. Төрийн тусгай хамгаалалтын газар нь  Монгол улсын Үндсэн хууль, Төрийн тусгай хамгаалалтын тухай хууль, Монгол улсын Төрийн ордны тухай хууль, Ерөнхийлөгчийн тухай хууль, Засгийн газрын тухай хуулийн дагуу үйл ажиллагаа явуулдаг. Засгийн газрын тогтоолоор  Төрийн ордон, “Их тэнгэр” цогцолбор, Ерөнхийлөгчийн зуны болон өвлийн өргөө, Маршал харш, Засгийн газрын яамдын байрууд болон бусад объектуудын хамгаалалтыг хэрэгжүүлдэг. Гэтэл өнгөрсөн зургадугаар сард Дархан цаазат Богдхан ууланд байрлах Төрийн тусгай хамгаалалттай Их тэнгэр цогцолборын газраас 7.4 га газрыг бусдын нэр шилжүүлжээ. 

Олон хууль тогтоомж зөрчиж, Байгаль орчин, Ногоон хөгжлийн яамныханг хүртэл дарамт шахалтанд оруулж байж Дархан цаазат Богдхан ууланд байрлах Төрийн тусгай хамгаалалттай Их тэнгэр цогцолборын газраас 7.4 га газар авсан хүн нь Мэдээлэл шуудан харилцаа, технологийн газрын даргаар ажиллаж Ж.Сансар. Тэрээр 2008 онд энэ ажлыг Ч.Сайханбилэгээс хүлээж авсан бөгөөд түүний дэмжлэгтэйгээр улс төрд хөл тавьсан залуучуудын нэг. Гэвч Ерөнхийлөгч Ц.Элбэгдоржийн зурагтай марк гаргаснаас өөр олигтой ажил хийгээгүй гэдэг тааруухан нэртэйгээр ажлаа хүлээлгэж байсан Ж.Сансар “Шинэхэн” гэдэг нэртэй компанийн захирал болчихсон Их тэнгэрийн 7.4 га газрыг өөрийнхөө эзэмшил болгоод явж байна. Хамгийн сонирхолтой нь БОНХАЖЯ-ныхан энэ мэдээллийг үгүйсгээгүй бөгөөд тэд “Үндэсний хурлын цогцолбор, аялал жуулчлал, зочид буудлын зориулалтаар үйл ажиллагаа явуулах гэрчилгээг “Шинэхэн”-д  Засгийн газраас олгосон. 

Иймд Засгийн газрын тогтоолоор  2020 он хүртэл Их тэнгэрийн аман дахь төрийн тусгай хамгаалалттай газрын 7.4 га-г  “Шинэхэн” гурпп эзэмшихээр болсон” хэмээн мэдэгдэж байх юм. Хувийн компанид 7.4 га газар эзэмшүүлэх тогтоол гаргасан Ч.Сайханбилэг, С.Баярцогт нар энэхүү “Шинэхэн” нэртэй компанийн ард байгаа. Ерөнхийлөгч Ц.Элбэгдорж ч энэхүү газрын асуудалд холбоотой байх магадлалтай гэж улс төрчид ярьж сууна. Ч.Сайханбилэг өнөөдөр эрх мэдэлтэй байгаа нь үнэн. Гэхдээ ямар ч Ерөнхий сайд хууль зөрчин дураараа аашилж болохгүй. Тиймээс энэ асуудлыг Үндсэн хуулийн цэцэд хүртэл өгч шалгуулах ёстой гэж тэд үзэж байгаа юм. Ч.Сайханбилэг г  “Шинэхэн” гурпп-т энэхүү газрыг олгохдоо АСЕМ-ын уулзалтад зориулан “Үндэсний хурлын цогцолбор, аялал жуулчлал, зочид буудал барина” гэж тогтоол гаргажээ. Өвөл хаяанд ирж, барилга байгууламжийн ажил таг зогссон энэ үед “Шинэхэн” групп ямар ч үйл ажиллагаа явуулах боломжгүй. 

Ирэх хавраас ажлаа эхлүүлсэн ч АСЕМ-ын хурлаас өмнө энд байшин барьж амжихгүй нь тодорхой. Тэгээд ч Ерөнхийлөгчийн тамгын газрын П.Цагаан  “Уулзалтад оролцож буй зочид, төлөөлөгчдийг байрлуулах 43 буудлыг ажлын хэсгийнхэн сонгосон. Эдгээр зочид буудлуудад 3586 өрөө, 5379 ор байна. Үүнээс ерөнхийлөгчийн өрөө 37 байгаа” хэмээн мэдэгдчихээд байхад Ч.Сайханбилэг иймэрхүү тогтоол гаргаж газар эзэмших эрх олгосон нь тодорхой болов. Шинэхэн групп Дархан цаазат Богдхан уулын 7.4 га газрыг өнөөдөр битүү хашаагаар хашаалж, харуул манаа гаргажээ. Тэд АСЕМ-ын нэрээр газар авч, АСЕМ-ын нэрээр хөнгөлттэй зээл авч, байшин барилга барина. 

Учир нь АСЕМ-ын зочдыг хүлээж авах зочид буудлуудад Засгийн газраас зочид буудлуудад хөнгөлөлттэй зээл олгохоор шийдвэр нь аль эрт гарчихсан байгаа. Нэг аж ахуй нэгжид 30 хүртэл тэрбум төгрөг олгох учраас эрх мэдэлтнүүд сайн байрлалттай газар төрөөс мөнгө авч, хувийн хөрөнгөтэй болох гэж хууль дүрмээ уландаа гишгэн улаарч байгаа нь энэ.  Тэд АСЕМ-аас өмнө буудлаа барьж амжихгүй. Харин энэ газар тэдний өмч хэвээрээ үлдэх нь тодорхой. Хэдийгээр 2020 он хүртэл “Шинэхэн” групп-т энэ газрыг эзэмшүүлэх тогтоол гарсан гэж БОНХАЖЯ-ныхан ярьж байгаа ч тэд барьсан барилгаа буулгааад ачаад явахгүй шүү дээ.

Ийнхүү АСЕМ дагасан хулгай луйвар улам бүр газар авч, энэ асуудалд Ерөнхийлөгч Ц.Элбэгдорж, Ерөнхий сайд Ч.Сайханбилэг нь хүртэл холбогдож эхэллээ. Тэд энэхүү хууль зөрчсөн шийдвэрээ тун их хаацайлж, нуухыг оролдож байгаа нь дээрх хардлагыг улам баталгаажуулж байна. Учир нь Ч.Сайханбилэг гаргасан тогтоол бүрээ Засгийн газрын  сайтад байршуулах ёстой. Гэтэл уг газрын зөвшөөрлийг өгсөн  сайдын шийдвэр мөн Засгийн тогтоолын аль нь ч албан ёсны сайтад байршаагүй байгаа юм.

http://www.shudarga.mn/