Өргөдлийн байнгын хорооны дарга О.Баасанхүү ЗГХЭГ-ын дэд дарга С.Баярцогтыг огцруулах гурван үндэслэлтэй хуулийн төслийг өргөн барьсан билээ. Үүнээс хойш хоёр гишүүний хооронд маргаан дэгдэх болсон.

Тэгвэл О.Баасанхүү гишүүн С.Баярцогтыг нийслэлийн Прокурорын газар өгөх болсноо мэдэгдэж мэдээлэл хийлээ. Тэрбээр УИХ-ын гишүүн С.Баярцогт нь О.Баасанхүү гишүүний нэр төрд халдсан учир прокурорт гомдол гаргахаар болсон гэнэ.

Мэдээлэл хийх үеэрээ О.Баасанхүү гишүүн хэлэхдээ “Би С.Баярцогтыг огцруулах асуудлыг ярихдаа түүний машин, мөнгөний асуудлыг огтхон ч яриагүй. Гэтэл намайг ярьсан мэтээр хэлж худалч болголоо. Нийслэлийн прокурор н.Амгаланбаатартай уулзаж С.Баярцогтыг ямар шалтгаанаар хөрөнгө орлогоо нуусан болохыг тогтоолгоно. С.Баярцогтыг огцруулах үндэслэлдээ гурван асуудлыг тусгасан. Гэтэл нотлох баримтгүй гэж байна. Уг нь өөрөө гарын үсэг зураад, өөрөө ярьчихсан учраас нотлох баримттай гээд тоохгүй байсан юм. Тэгэхээр энэ асуудал дээр эрүүгийн хэрэг үүссэн юм уу, үүссэн бол яагаад хэрэгсэхгүй болгосон юм. Нэг сая юм уу, арван сая юм уу гэдэг мэдээллийг прокуророор тогтоолгоно” хэмээсэн юм.

Эх сурвалж: Шуурхай.мн