​

Орон сууцны үнэ энэ оны зургаадугаар сараас хойш буюу найман хувийн зээл олгож эхэлснээс хойш 15-25 хувиар өссөн талаарх судалгаа гарсан.

Тодруулбал 2012 онд нийт 11 мянган айлын орон сууц ашиглалтад орж байсан бөгөөд нэг метр квадратын үнэ нь дунджаар нэг сая 650 мянган төгрөгийн ханштай байсан байна. Харин энэ оны аравдугаар сарын байдлаар 15 мянган айлын орон сууц ашиглалтад орсон бөгөөд  нэг метр квадрат нь хоёр сая 200 мянган төгрөгийн ханштай болж өсчээ. Өнөөдрийн байдлаар шинээр ашиглалтад орж байгаа нэг өрөө байр дунджаар Баянгол дүүрэгт 58 сая, Сонгинохайрхан дүүрэгт 60 сая, Баянзүрх дүүрэгт 54 сая, Хан-Уул дүүрэгт 59 сая, Чингэлтэй дүүрэгт 63 сая, Сүхбаатар дүүрэгт 70 сая төгрөгийн ханштай байна. Барилга хот байгуулалтын яамны мэдэгдэж байгаагаар ирэх онд нийт 34 мянган айлын орон сууц ашиглалтад орох төлөвтэй байгаа гэнэ. Тэгвэл ийм хэмжээний орон сууц шинээр ашиглалтад орох нь орон сууцны үнэ буурахад сайнаар нөлөөлнө гэдгийг тус яамны мэргэжилтэн хэлж байгаа юм. Тодруулбал эрэлт, нийлүүлтийн харьцаа тэнцвэржсэн үед үнэ буурах боломжтой гэв. Гэвч барилга хөрөнгө оруулалтын судлаач нар барилгын үнэ 2013 онд огцом өссөн учраас ирэх онд онд буурах боломжгүй. Харин зах зээлийн үнэ нь тогтворжих хандлагатай байгаа хэмээн үзэж байгаа аж. Учир нь барилга барихад шаардагдах материалын үнийн өсөлт болон гадаад валютын ханш нөлөөлөх хандлагатай  байдаг аж.

 

М.Баясгалан: ОРОН СУУЦНЫ НЭГ МЕТР КВАДРАТЫН ҮНЭ ИРЭХ ОНД ХОЁР САЯ 300 МЯНГАН ТӨГРӨГ БАЙНА

 

Хөрөнгө оруулалтын зөвлөх UMC Alpha компанийн Хөрөнгө оруулалт хариуцсан захирал М.Баясгалангаас орон сууцны зах зээлийн нөхцөл байдлын талаар зарим зүйлийг тодруулсан юм.

 

-Ирэх онд нийслэлийн хэмжээнд 34 мянган айлын орон сууц ашиглалтад орно гэж холбогдох яамнаас мэдэгдэж байна. Тэгэхээр нийлүүлэлт өсөхөөр орон сууцны үнэ буурах боломж бий юу?

-Ирэх жилд орон сууцны үнэ буурах боломж байхгүй. Энэ асуудал бол ганц эрэлт, нийлүүлтэдийн асуудлаар шийдэгдэхгүй. Учир нь манай худалдан авагч нарын чадвар сул байгаа. Тиймээс ирэх онд ашиглалтад орох барилгуудын дийлэнхийг орон сууцны зээлээр л санхүүжиж худалдаж авна. Тиймээс эдгээр барилгууд банкны зээлийн барьцаанд байх бөгөөд ийм нөхцөлд орон сууцны үнэ буурвал банкууд эрсдэлд орж, санхүүгийн систем тэр чигээрээ хямарч болзошгүй. Нөгөө талаас үнийн огцом өсөлт шууд буурах боломжгүй юм. Хэрэв банк эрсдэлд орвол зээлийн хүү өсөх бөгөөд энэ нь эргээд орон сууцны зээлийг хязгаарлах нөхцөл болно. Цаашид ипотекийн зээлийн хөтөлбөр МИК-иар дамжиж үнэт цаасаар баталгаажаад явах юм билээ. Тэгэхээр хөрөнгө оруулаг­чид үл хөдлөх хөрөнгийн үнийн өсөлтийг харах боломжтой. Хэрэв үнийн өсөлттэй байвал тэр үнэт цаас эрсдэлгүй. Гэхдээ өсөлт нь хэвийн байх ёстой. Үнэлгээ буурвал үнэт цаасны зах зээлд дагаад эрсдэл орох учраас орон сууцны үнийг буулгах боломжгүй болно. Манайд бага хүүтэй зээл олгож эхэлснээр гурван давалгаа явлаа. Эхнийх нь хуучин зээлтэй байсан хүмүүс бууруулж, өрийн дарамтаа багасгалаа. Хоёр дахь давалгаа нь орон сууцгүй байсан иргэд зээлэнд хамрагдах боллоо. Хөтөлбөр батлагдснаас хойш 16 мянга 112 иргэн зээлээ шилжүүлж найман мянга 129 иргэн шинээр зээл аваад байна. Гуравдахь давалгаа нь өөрийн орон сууцтай, төлбөрийн чадвартай иргэд орон сууцаа барьцаалаад өөр шинэ, нөхцөл сайтай байр авах болом­жийг өгсөн юм.

-Цаашид үл хөдлөх хөрөнгийн зах зээлийн төлөв ямар байх бол?

-Цаашид орон сууцны зах зээлийн эрэлт буурахгүй тогтмол өснө. Харин нийлүүлт харьцангуй нэмэгдэж байгаа ч үнийг хязгаарлах олон хүчин зүйл бий. Тухайлбал цахилгаан дулааны хангамж хүрэлцэхгүй байна, хотод газар олдохоо больсон, барилгын материалын үнэ ханш нэмэгдэх зэрэг нь нийлүүлэлтийг хязгаарлах нөх­цөл болно. Тэгэхээр цаашид орон сууцны барилга хотын захын дүүргүүдээр түлхүү баригдах бол хотын төв оффис, худалдаа үйлчилгээний төвүүд голлож байрлана.Мөн орон сууцны үнэ, худалдаа үйлчилгээний талбайн түрээс урт хугацаанд өсөх бол оффисын түрээсийн төлбөр харьцангуй тогтмол байх хандлага ажиглагдаж байна.

-Энэ жил Засгийн газ­раас орон сууцны үнийг тогтворжуулах үүднээс барилгын материалын үнийг барих бод­лого хэрэгжүүлсэн. Энэ бодлого орон сууцны үнэ буурахад нөлөөлөх боломж бий юу?

-Энэ мэт бодлого хэрэгжүүлсэн нь зөв. Гэхдээ нарийн тоон судалгаа гаргаагүйн улмаас тухайн компани үнэхээр энэ хэрэгжүүлж байгаа бодлогод хамрагдаж чадаж байна уу үгүй юу гэдэг нь тодорхой бус байгаа юм. Тодруулбал хэчнээн компанид хөнгөлөлт үзүүлсэн бэ гэдэг нь мэдэгдэхгүй байна.

-Эрэлт, нийлүүлэлт тэнцвэржвэл үнэ буурах хандлага ажиглагддаг. Тэгэхээр ирэх онд орон сууцны үнэд зах зээлийн энэ байдал яаж нөлөөлөх вэ?

-Нийлүүлэлт нэмэгдэхээр эрэл­тийг бууруулдаг ч нөгөө талаараа эрэлт нь нийлүүлэлтийг урамшуулдаг юм. Тэгэхээр манай зах зээлд одоогийн байдлаар зах зээлийн тэнцвэржилт харагдахгүй байна. Харин ирэх онд нийлүүлт нэмэгдэхээр орон сууцны үнэ зах зээлийн хуулиараа тогтворжино. Бидний хийсэн судалгаанаас харахад орон сууцны нэг метр квадратын үнэ хоёр сая 300 мянган төгрөг байх төлөв байна.

 

Н.Баасандэмбэрэл