ГССҮТ-д өчигдөр /2023.03.08/ биедээ ил харагдах гэмтэлтэй, ухаангүй байдалтай бага насны хүүхэд хүргэгдэн иржээ. Тус эмнэлгээс хүүхдийн талаарх мэдээллийг цагдаагийн байгууллагад хүргүүлсэн бөгөөд уг хэргийг шалгаж эхэлсэн байна. 

Хүүхдийг ГССҮТ-д хүргэсэн ч хүүхдийн ээж цагдаад дуудлага өгөөгүй аж. Ээжийг нь гэмт хэрэг нуун дарагдуулсан хэмээн шалгаж байгаа учир хүүхдийг одоогоор эмээ нар нь сахиж байна.

Хүүгийн бие ямар байгаа талаар ГССҮТ-өөс тодруулахад, Хүү гуравдугаар сарын 8-ны өглөө хүргэгдэж ирсэн, гэмтлийн шалтгаан тодорхойгүй гурван настай хүүхдийн биеийн байдал одоогоор маш хүнд, амьсгалын аппараттай байна. 

Тухайн хүүхэд хүзүү, нуруу, гарны хугаралтай, тархины битүү цус хуралттай буюу хавсарсан хүнд гэмтлийн оноштойгоор Эрчимт эмчилгээний тасагт хэвтэн эмчлүүлж байгаа юм. 

Түүнчлэн ГССҮТ-ийн Хүлээн авах яаралтай тусламжийн тасагт Нийслэлийн цагдаагийн удирдах газрын Шуурхай удирдлагын хэлтсийн ахлах мөрдөгч нар ээлжийн хуваарийн дагуу 24 цаг ажиллаж байна гэж мэдээлэв.