Эрх баригчдын бүрэн эрхийн хугацаа тал дундаа орж явна. Өнгөрөгч 2012 оны сонгуулиар мөрийн хөтөлбөрийн биелэлт, амлалт юу болж байгааг эргэн харах цаг нь нэгэнт болжээ.
Өнөөдрийн байдлаар ямарваа нэгэн амлалт биелэгдэх хангалттай хугацаа өнгөрсөн учраас сонгогч олон үүнийг нэхэж эхэллээ. Угаасаа ч улс орны эдийн засгийн байдал сайнгүй байна. Тэгэхээр эрх баригчид болон хувь улстөрчид чухам юу амлаж, донгодож явсныг эргэн харахад гэмгүй. Ард түмэн төр барих эрхийг нь өгч сонгосон. Одоо сонгогч олон саналынхаа хариуг нэхэх цаг нь болсон төдийгүй, эргээд хариуцлага ярих, тооцох хэмжээнд очсон. Тиймээс бид энэ удаад Засгийн газрын хэрэг эрхлэх газрын дарга, Монгол Улсын сайд  Ч.Сайханбилэгийн амлалтыг эргэн сануулж, дүгнэлт хийе. Тэгэхдээ түүний амласан бүх худлаа зүйлийг биш, ганцхан энгийн жишээг авч үзэх гэсэн хэрэг. 
     Монгол Улсын сайд Ч.Сайханбилэг нь хорин хэдхэн настайгаасаа их улстөрд хөл тавьж, гуч хүрээгүй насандаа Гэгээрлийн сайдын алба залгуулж явсан туршлагатай улстөрч. Тиймдээ ч тэрээр тойргийнхоо сонгогчдод их энгийн бөгөөд амьдралд ойр зүйл амласан байна лээ. Тухайлбал, энэ зураг дээр “Талх гурилын үнийн өсөлтөөс хамгаалах сан байгуулж, зөрүүг иргэдэд олгоно” гэжээ. Аргагүй л залуугаасаа луйвар хийж худлаа хэлж сурсан хүний амлалт гэдэг нь өнөөдрийн байдлаас илт харагдана. 
    Хамгийн наана бодоход 2012 онд буюу өдгөөгөөс хоёр жилийн өмнө бидний сайн мэдэх, өдөр тутмын хэрэглээ болсон “Атар” талхны үнэ 630 төгрөг байв. Харин өнөөдөр 850-900 төгрөгт хэлбэлзэж байна. Тэгвэл 2012 оны байдлаар бидний түгээмэл хэрэглэдэг “Алтан тариа”-гийн нэгдүгээр зэргийн гурил килограмм нь 750 төгрөгөөр зарагдаж байв. Гэтэл өнөөдөр энэ төрлийн гурил килограмм нь 1200-1300 төгрөгт хэлбэлзэх болжээ. Тодруулбал, Ч.Сайханбилэг сайдыг ийн амлаж зогссоноос хойш талхны үнэ 250 орчим төгрөгөөр, гурилын үнэ дундажаар 400 төгрөгөөр нэмэгдсэн байна. 
     Эрхэм сайдын амлаж байснаас харвал түүний “Талх гурилын үнийн өсөлтөөс хамгаалах сан”-гаас иргэд чамгүй хэдэн тэрбум төгрөг авахаар харагдаж байна. Амласандаа хүрдэг бол шүү дээ. Тэр тусмаа баянзүрхчүүд бол Ч.Сайханбилэгээс чамгүй авлагтай нь харагдана. Амлалт ёсоор бол эрхэм сайд маань ард түмнийхээ өмнө төлж барахгүй их өртэй зогсож байна. Ийм л худалч нөхөр өнөөдөр иргэдийг хулхидаж, УИХ-д гарчихаад улмаар Монгол Улсын сайд хэмээх эрх бүхий албанд морилж байна. Уг нь бол үнийн өсөлтөөс хамгаалах сан байгуулаад түүнээс мөнгө өгөөд байдаггүй юм гэхэд хоёрхон жилийн хугацаанд өсгөсөн өргөн хэрэглээний барааныхаа үнэд хяналт тавьж ажиллаад байж болох томоохон албан тушаал бол Могол Улсын сайдын суудал мөн. 
       Гэтэл энэ бүгдэдээ хяналт тавьж ажиллахгүй яасан хэрэг вэ хэмээн сонгогч олон түүнийг зүхэж сууна. Чадахгүй бол юугаа хийж худлаа амласан юм гэх ч хүмүүс олон бий. Одоо ёстой Ч.Сайханбилэг ээ өнөөх үнийн өсөлтөөс хамгаалах сан яасан бэ. Зөрүү олгох яасан бэ хэмээн өдөр бүхэн чихнээс нь хонх уяхаас өөр аргагүй. Харин мэдээлэл сөхөөд харвал Ч.Сайханбилэг ийн амлаж байсан шигээ сан байгуулсан ч үгүй. Юун үхсэн хатсны зөрүү олгох. Тэр ч бүү хэл инфляцийн тухай нэг ч яриа дэлгэсэнгүй. Сонгогч иргэдтэй нэг ч удаа уулзаагүй гэдгийг эх сурвалж хэлсэн юм. 
А.Гал