Их хотынхон гэж нэрлэгддэг хэрнээ бид соёлжих болоогүй байна. Үүний тод жишээ нь, түрээсийн дугуй, скүүтерийг эвдэх үйлдэл зогсохгүй үргэлжилсээр...Мөн өөрсдийнх нь татварын мөнгөөр босгосон зам, нийтийн эзэмшлийн талбайд байрлах сандал, хогийн савыг сүйтгэсээр байгаа нь харамсалтай. 

Наадамчдын өргөн чөлөө, Яармаг, Нисэх чиглэлийн автобусны зорчих хэсгийг үргэлжилсэн хаалт хашлагийг эвдсэн асуудал өчигдөр гарсан. Тус хашаа нь 12 мянга гаруй метрийн урттай аж. Өртөг нь 950 сая төгрөгөөр худалдан авчээ. Гурван байршилд хаалт хашлагийг байршуулсан юм байна. Хашлагийг  согтууруулах ундаа хэрэглэсэн үедээ машинаараа мөргөж эвдэж сүйтгэх үйлдэл ч гарч цагдаагийн байгууллагын зүгээс шалгаж байгаа гэлээ.

Мөн өнгөрсөн наймдугаар сарын 25-ны өдөр Улаанбаатар хотод дэлхийн томоохон хотуудын жишиг стандартын дагуу “Hi sainuu” дугуй түрээсийн үйлчилгээг эхлүүлж, тус компанийн залуус шар, цэнхэр өнгийн мянган дугуйг үйлчилгээнд гаргасан. Ингэхдээ нийтийн эзэмшлийн талбайд дугуйгаа олноор байршуулж, эхний 30 секунд үнэгүй. Үүнээс хойш 15 минут нь мянган төгрөг байхаар тооцоолж, замын ачааллыг бууруулж, иргэдийн цаг хугацааг хэмнэхээр уг үйлчилгээг эхлүүлжээ. Гэвч өнөөдрийн байдлаар шинээрээ гарсан мянган дугуйнаас 270 гаруйн санаатай болон санаандгүй эвдрэл, гэмтлийн улмаас ашиглагдах боломжгүй болсон байна. Тус дугуйнуудын зах зээлийн нэг бүрийн үнэ нь 720 мянган төгрөг аж.  Дугуйнуудад илэрч буй хамгийн их механик гэмтэл нь QR кодыг ажиллагаагүй болгох үүднээс будах, хагалах, байршил тогтоогчийг нь салгах үүднээс тастагчаар тастах, гинжийг нь санаатай таслах зэргээр ихэвчлэн хүний гараар санаатай үйлдэгдсэн эвдрэлээс үүдэж 270 гаруй дугуй ийн ямар ч явах боломжгүй болоод байгаа юм. 

Өмнө нь цахилгаан скүүтерийг үйлчилгээнд нэвтрүүлэхэд хулгайлах өөрийн өмч мэтээр аашлах нь хэрээс хэтэрч байв. Гэртээ аваачаад амбаартаа түгжих, явах маршрутаас хол газар аваачиж хаях гээд олон асуудалтай тулгарсаар ажилчид нь олж аван цуглуулдаг гэдгийг дуулгасан. Түүнчлэн нийтийн эзэмшлийн гудамж талбайд байгаа сандал, хогийн савыг эвдэж сүйтгэж бусдын амьдрах орчныг бохирдуулах гээд хувь хүнээс шалтгаалсан соёлд суралцмаар байна, нийслэлийнхэн минь!!! Бид хэзээ соёлжих вэ?