Сүүлийн үед Авилгатай тэмцэх газрын дэд дарга Б.Хурцтай холбоотой гомдол гарах болоод байна. Тагнуулын ерөнхий газрын хэлтсийн дарга асан Д.Цогтбаатар “Б.Хурцтай хамт ажиллаж байхад тэр намайг болон бусад нөхдийг дандаа хууль бус үйлдэлд уруу татаж, зөвшөөрөхгүй болохоор занадаг байсан.

Одоо түүнийгээ марталгүй намайг хориулж, дарамталж байна гэсэн захидлыг урьдчилан хорих төвөөс илгээгээд буй.

Мөн татварын дарга нарын хэрэгт холбогдож хоригдсон Баянгол дүүргийн татварын хэлтсийн дарга асан Д.Энхбатын эхнэр нь Б.Хурц хорссондоо манай нөхрийг хэлмэгдүүлж байна хэмээн ярилцлага өгсөн.

Эдгээр хүмүүсийн бичсэн болон ярьсан зүйлс дунд нь ноцтой асуудлууд цөөнгүй байгаа. Тэгэхээр Б.Хурцыг холбогдох хууль хяналтынхан шалгах нь зүйтэй гэдэгт цөөнгүй хүн ч санал нэгдээд байгаа сураг байна.

 

Д.Цогтбаатарын бичсэнээс үзэх юм бол хууль бус үйлдлүүдийг нь мэдэх түүний амыг өрсөж хамхиулах зорилгоор түүнийг цагдан хориулжээ. 

Харин Д.Энхбатыг авлигын хэргээр хоригдох болсоны цаана Б.Хурцын эхнэр Сарнайгийнх нь “Сарнайх” компанитай холбоотой татварын хэргүүд байгаа гэх.

 Энэ бүхнээс болж Б.Хурц эдгээр хүмүүсийг далд байлгах гэсэн мэт.

Эдгээрээс гадна Б.Хурц одоогийн МАН-ыг МАХН  байхад буюу  дангаар засгийн эрх барьж, Н.Энхбаярыг ид “галзуурч” байх тэр үед тухайн үеийн ажлын шаардлага, төрийн даалгавраар Францаас ХБНГУ, Бельгиэр дамжуулан тусгай ажиллагаа явуулан Д.Энхбат агсаныг баривчилж ирж байв.

 Иймэрхүү ажиллагааг дэлхийн улс орнуудын тусгай албад гүйцэтгэсээр ирсэн ба одоо ч гүйцэтгэсээр л байгаа.

Гэтэл манай улстөрийн бохир явуулгад гаршсан улстөрчид үүнийг хэт улстөржүүлсэн нь цөөнгүй.

Үүнийг их гүрнүүд хараанаасаа холуур өнгөрөөгөөгүй нь мэдээж.

Тиймээс манай тусгай албаны ажилтнуудын нутаг дэвсгэр дээр нь явуулсан үйл ажиллагаанд Европын улс орнууд тэр дундаа Герман улс дургүйцэхээс ч аргагүй байв.

 

Гэтэл Ц.Элбэгдорж Ерөнхийлөгчийн дэргэдэх ҮАБЗ-ийн ажлын албаны дарга болсон Б.Хурц Англи улсад ажлын айлчлал хийхээр явлаа.

Эндээс том асуудал үүсч Монгол улсын ҮАБЗ-ийн ажлын албаны дарга хэмээх өндөр албан тушаалтан Б.Хурц Лондонгийн “Хитроу” онгоцны буудалд буугаад л саатуулагдав. Бүтэн жил гаруй тэнд хоригдсон Б.Хурцыг ХБНГУ манай нутаг дээр хүн хулгайлах гэмт хэрэг хийсэн учир манай талд шилжүүл хэмээн нэхсэн.

 Энэ хугацаанд манай Гадаад хэргийн дэд сайд болон ХЗДХ-ийн төрийн нарийн бичгийн дарга нараар удирдуулсан баг Б.Хурцыг суллуулахаар хөөцөлдсөн юм.

Гэвч тэр их хүчин чармайлт талаар болж Англичууд түүнийг ХБНГУ-д шилжүүлэн өгөх нь тэр. Тэгэхэд монголчууд ”энэ одоо өнгөрлөө” гэлцэж байсан билээ.

 

Гэвч түүнийг шилжүүлэн өгснөөс хойш хэдхэн хоногийн дараа гадаадад айлчлал хийж явсан Ерөнхийлөгч Ц.Элбэгдорж дагуулаад ирсэн билээ.

Ийнхүү зүгээр төрийн ажил хийж яваад хүний нутагт жил хагас хоригдсон Б.Хурц өөрийн баригдсан шалтгаанаа МАН-тай холбож үздэг учраас одоо тус намынхныг ээлж дараалан намнаж байгаа тухай яриа ч хүчтэй яригдсаар ирсэн.

 

Түүнийг Ц.Элбэгдорж Ерөнхийлөгч гэнэт дагуулж ирсэн шигээ гэнэт АТГ-ын дэд даргын суудалд санал болгож томилуулсан билээ. Тэр үед зарим хүн “МАН-аас хэдэн хүн шоронд хийчихээр яаж сонгуульд ялахыг нь харна аа”  гэж Б.Хурц заналхийлсэн хэмээн цуурч байсан билээ.

Б.Хурц АТГ-ын дэд дарга болоод удаагүй байхад тус газрынхан Н.Энхбаярыг бор оймстой хөлийг нь гозогнуулан баривчилж хорьсон ба улмаар жилийн дараа яллуулж чадсан.

Гэвч эдүгээ Н.Энхбаяр уучлагдаж, БНСУ-д очоод жил тойрлоо. Н.Энхбаярын яллагдсан хэргийн заримд нь нэр холбогдсон Нийслэлийн Засаг дарга, УИХ-ын гишүүн асан Ц.Батбаярт саяхан хоёр жилийн ял өгөөд байна.

Ер нь Б.Хурц өөрт нь тааламжгүй хандсан нөхдөөс, тэр дундаа экс эрх баригчдад хорссон хорслоо авлигын хэрэгт холбогдуулан яллуулж тайлдаг юм биш үү хэмээн ярих хүн ч олшроод байх юм.

МАН-ынхан АТГ-аас эхлээд Цагдаагийн үүдэнд олноороо чулуу няслах болсон болон ял авч байгаа нь энэхүү ярианы үндэс болсоор байна.

Энэ тухайд Б.Хурц өөрөө тайлбар хийх, мөн түүнийг дээр өгүүлсэн асуудлуудаар шалгаж байж л асуудал намжих болов уу.

Д.Саруул