10 настай охин хөршийнхөө тарвасыг хураахаар гараад сураг алдарч яг 14 хоногийн дараа цогцос нь олдсон харамсалтай хэрэг гарсан. Тэгвэл охины аминд хүрсэн гэх иргэд өмгөөлөгч хэдийнээ авсан гэдгээ Ховд.мн сайтад ярилцлага авах үеэрээ онцолж байлаа. Эх сурвалжийн мэдээлж буйгаар тэд 3-4 өмгөөлөгч авсан хэмээлээ. 

Талийгаач охины аав С.Аманжол "Охиныг минь хөнөөсөн хөршийнх 3-4 өмгөөлөгч авсан байна. Бидэнд өмгөөлөгч хэрэгтэй байгаа. Охины минь хэрэг хот руу шилжиж байна. Хотын нэг өмгөөлөгчид хандсан 22 сая төгрөгөөр өмгөөлнө гэсэн. Иймд Монголын ард түмэн та бүхэн өмгөөлөгч авахад туслаад өгөөч" хэмээн Ховд.мн сайтад хандаж олон түмнээсээ гуйлаа. 

10 настай талийгаач А.Амина охины өмгөөлөгчөөр Р.Булгамаа үнэ төлбөргүй ажиллаж, хууль эрхзүйн туслалцаа үзүүлэхээр болсон талаараа өөрийнхөө цахим хуудсаар дамжуулан олон нийтэд дуулгалаа. Тэрээр "Хүүхдийн Эрхийн төлөө туслая аа. Хүүхдийн эрхийн өмгөөлөгчид ярилцаж байгаад хамтдаа тусална аа" гэлээ.