Засгийн газраас хүчээр МУИС-тай нэгдсэнээс үүдэн үйл ажиллагаа нь доголдох болсон Улаанбаатар хотын Их сургууль оюутан багш ажилчдынхаа хүсэлт, тэмцлийн үр дүнд МУИС-ийн харьяалалаас гарч Нийслэлийн харьяанд орж, бие даасан статистусаа сэргээх нь тодорхой болсон.

Үүнтэй зэрэгцэн Худалдаа үйлдвэрлэлийн дээд сургууль ч мөн МУИС-ийн харьяалалаас гарч бие даах асуудал дээр дооргүй хүчтэй яригдаж байна. МУИС-ийн Удирдах зөвлөлийн шийдвэр, бүтцийн өөрчлөлтийн дагуу 90 жилийн түүхтэй худалдааны салбарын ууган сургуулийг Эдийн Засгийн Сургуультай нэгтгэн “Бизнесийн Сургууль’ болгох шийдвэр гарсан.

Харин тус сургуулийнхан “Төрийн нэг шийдвэртэй 2 сургуулийн нэг нь устаж байхад нөгөө нь хуучин хэвээрээ байгаа нь төрийн сайдын нийтэд шударга үйлчилж буй дүр төрх мөн үү?” гэх агуулгатай албан бичгийг салбарын сайддаа хүргүүлжээ. Монгол Улсын тэргүүлэх сургуулиудын нэг ХҮДС Монгол улсын худалдаа, үйлдвэрлэл, нийтийн хоолны үйлчилгээний салбарын хөгжилд 90 жилийн хугацаанд бүтээн босгосон бүхэн нь дээрх шийдвэрийн балгаар бүдгэрч  ажлаа явуулах арга зүйн чиглэл алдагдахад хүрчээ. Улаанбаатар хотын их сургууль ч мөн л ийм байдалд хүрсний улмаас бие даах шийдвэр гаргах хэмжээнд хүрсэн нь үнэн. Юутай ч Засгийн газар ямарч тооцоо, үндэслэлгүйгээр гаргасан шийдвэрээ эргэн харж Монгол улсын худалдаа үйлчилгээний салбарыг ирээдүйг баллахгүй байхаас өөр аргагүйд хүрч байгаа бололтой.