УИХ дахь МАН-ын бүлгийн хуралдаан дуусмагц Төрийн байгуулалтын байнгын хороо хуралдаж, Засгийн газрыг огцруулах саналыг хэлэлцсэн ч гишүүдийн 52.9 хувийн саналаар дэмжигдсэнгүй.

 

Бүлгийн хуралдаанд нийт 19 гишүүний 17 нь оролцож 89.5 хувийн ирцтэй эхэлсэн. Хуралдааны эхэнд УИХ-ын гишүүн Т.Аюурсайхан Ерөнхий сайд Ж.Эрдэнэбатыг огцруулахаар өргөн барьсан саналын үндэслэл, шалтгаанаа танилцуулсан юм. Тэрбээр “Засгийн газар найман төрлийн концессын гэрээ хийсэн. Мөн өнгөрсөн жил ажил хийгээгүй, 60 тэрбумаар төрийн албыг наймаалцсан асуудлаа хаацайлсан, маш олон хууль санаачлаад буцаасан. Тиймээс Ж.Эрдэнэбат сайдад хариуцлага тооцох ноцтой үндэслэл байна гэж үзсэн. Энэ асуудлыг Үндсэн хуулийн 43 дугаар зүйл заасны дагуу, Дэгийн 38.1 дүгээр заалтыг үндэслэж тус тус хэлэлцэж өгөхийг хүсч байна” гэсэн юм.

 

УИХ-ын гишүүн Л.Болд Засгийн газрыг огцруулах бичигт гарын үсэг зурсан гишүүн хэд болсныг асуухад УИХ-ын гишүүн Т.Аюурсайхан “Огцруулах бичигт өргөн барих үеэр 30 гишүүн гарын үсэг зурсан байсан. Саналаа татсан нэг ч гишүүн байхгүй.  Гарын үсэг зурсан гишүүдийг элдвээр доромжилж байна. Энэ 30 гишүүн итгэл үнэмшлээр зурсан. Албан тушаалын төлөө яваагүй. Өнөөдөр Монголд хууль хүчин, бизнесийн, улс төрийн нам дамнасан бүлэглэл бий олсон байна. Улс нь улс шиг, парламент нь парламент шиг, Засгийн газар нь Засгийн газар шиг байгаасай гэсэн итгэл үнэмшлээр энэ 30 гишүүн өндөр эрсдэл гаргаж явж байна. Засгийн газарт орохгүй, сайд болохгүй” гэж хариулав.

 

Ерөнхий сайд Ж.Эрдэнэбат “60 тэрбумын асуудлаар би өөрийн байр сууриа хэлсэн. Хэрэв би хэн нэг хүнээс нэг төгрөг авч албан тушаалд томилсон байх юм бол өнөөдөр би огцроход бэлэн байна гэж хэлсэн. 800 тэрбумын концессын асуудал гэж ярьж байна. Үүнийг АН-ын бүлгийн даргаас асуусан дээр байх. Манай Засгийн газар хоёр л концесс байгуулсан. Нэг нь Дорноговийн автозам, нөгөө нь Хан-Уул дүүрэгт 300 ортой хүүхдийн эмнэлэг барих концесс. Энэ эмнэлэг дутуу баригдчихсан, үүнийг дуусгах л гэрээ байсан юм. Үлдсэн бусад бүх концесс нь өмнөх Засгийн газрын үед байгуулагдсан. Бид мөнгөн дүнг нь багасгаж, төлөх хугацааг нь уртасгаснаар нийтдээ 50 тэрбум төгрөг зургаан концессоос хэмнэсэн. Ийм үйл ажиллагаа явсныг сүүлд гарсан хуулийн үндэслэлээр өмнө нь гарсан шийдвэрийг зөрчсөн гээд тавьчихсан байгаа юм.  Хууль хүчний байгууллагын асуудал хөндөж байна. Сошиал орчинд маш их маргаан дагуулсан, шүүх хяналтын байгууллагад байнга шаардсан ийм л асуудал явж байгаа. Тэрнээс Засгийн газар болон Ж.Эрдэнэбат миний зүгээс зохион байгуулсан зүйл огт байхгүй гэдгийг хариуцлагатайгаар хэлье” гэв.

 

 

Үүний дараа гишүүд санал хэлсэн бөгөөд УИХ-ын гишүүн Ж.Батзандан “Огцруулах асуудлыг бид нарийвчлан судалж үзсэн. Концессын гэрээг Засгийн газрын гишүүний нэгдмэл ашиг сонирхолтой газартай байгуулсан нь үнэн. Хүүхдийн мөнгийг ялгаварлан гадуурхаж олгосон. Зоримог алхамыг энэ Засгийн газар хийхгүй байна гэдэгтэй би санал нэг байгаа. Засгийн газарт хариуцлага тооцох ёстой гэж АН-ын бүлэг үзсэн. Хариуцлагын олон хэлбэр байдаг. Хариуцлага алдсан сайд нартаа тооцох гэх мэт. Төрийн ажлыг гацаахгүйгээр Засгийн газартаа хариуцлага тооцоод ажлыг нь урагштай явуулах талаар бодох нь зүйтэй байх” гэв.

 

Д.Эрдэнэбат гишүүн “Н.Алтанхуягийн Засгийн газрыг огцруулж байхад цөөнхийн бүлэг нэг зүйл хэлж байсныг энд би давтаж хэлмээр байна. Засгийн газрыг цөөнх биш олонх огцруулдаг гэж хэлсэн. 65-ын бүлэг өөрсдөө Засгийн газраа огцруулж байна. АН-д өөрсдийн бурууг бүү тох. Ерөнхийлөгчийн сонгууль Засгийн газарт дүн тавьсан нь үнэн. Эрх баригч, үнэмлэхүй олон суудалтай МАН асуудлаа хурдхан нэг тийш нь шийдэх хэрэгтэй байна. Энэ асуудлаа хуулийн дагуу, хуулийн хугацаандаа шийдэж дуусгаасай. Олонх л асуудлаа шийддэг шүү” гэсэн юм.

 

Ийнхүү гишүүд асуулт асууж, саналаа хэлж дууссаны дараа Ерөнхий сайд Ж.Эрдэнэбатыг огцруулах асуудлаар санал хураалт явуулахад хуралдаанд оролцсон гишүүдийн 47.1 хувь нь дэмжиж, 52.9 хувь нь татгалзав. Тодруулбал нийт 17 гишүүн санал өгсний ес нь Ерөнхий сайдыг огцруулах шаардлагагүй гэж үзсэн бол найм нь огцруулахыг дэмжсэн юм.

 

Байнгын хорооны уг санал дүгнэлтийг УИХ-ын чуулганы нэгдсэн хуралдаанд танилцуулах боллоо. 

 

 

Эх сурвалж: "Монцамэ" агентлаг