УИХ дахь Ардчилсан Нам(АН)-ын бүлгийн хурлаар ярилцсан асуудлаар тус бүлгээс өнөөдөр мэдээлэл хийлээ. 

УИХ-ын гишүүн О.Цогтгэрэл "Гурван асуудлын талаар ярилцлаа. 

1. Замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийг хуулийн агуулгын хүрээнд ярилцсан. Өрсөлдөөнгүй, хаалттай худалдан авалт хийснээр ямар их авлига бий болдгийг сая нийтээрээ харсан. Гэтэл нийслэл дээр дагалдаж орж ирж байгаа 20 гаруй хуулийн нэг нь нийслэлийн худалдан авалтыг шууд гэрээгээр хийнэ гэж байна.
2. “Эрдэнэс тавантолгой” ХК-д Бүгд Найрамдах Монгол Ард Улсын хуулийг үндэслээд Бүрэн эрхт төлөөлөгч томилж байна.
3. Уул уурхайн бүх компани бараа бүтээгдэхүүнээ зөвхөн биржээр арилжаална гэж байгаа. Гэтэл одоо орж ирж буй Уул уурхайн биржийн тухай хуулиар стратегийн ач холбогдолтой төсөл хэрэгжүүлэхэд биржийн биш арилжаагаар зарж болно гэнэ. Авлигатай тэмцэнэ гэсэн уриа нь яасан бэ" гэв. 

"Д.Сумъяабазар даргын үед олж илрүүлсэн дөрвөн тонны нөөцтэй Дорноговь аймагт байгаа нүүрсний ордыг цааш нь Х.Нямбаатар дарга үргэлжлүүлж явах юм гэнэ. Ингэхдээ саад болж байсан стратегийн орд мөн үү, биш үү гэх асуудалтай холбоотойгоор төсөв дагасан хуулиараа өөрчилж байна. Мөн орж ирсэн хуулиар стратегийн ач холбогдолтой төсөл хэрэгжүүлэхэд биржээр арилжаалахгүй байж болно гэдэг нь тус ордтой холбоотой" хэмээн УИХ-ын гишүүн  Н.Ганибал нэмж хэлэв.

Түүнчлэн УИХ-ын гишүүн Б.Пүрэвдорж "Засгийн газар төсөв дээр эхлээд зарлагаа зурчхаад дараа нь орлогоо зурж байна. Гэтэл айл өрхүүд эхлээд орлогоо зураад зарлагаа төлөвлөдөг. 2020 оны сонгуулиар ард иргэдийн орлогыг хоёр дахин нэмэгдүүлнэ гэсэн мөрийн хөтөлбөр нь огт байхгүй болж, хүмүүс ядуурч байгаа. Гэтэл дарга нарын зардал хоёр дахин өсчихсөн байна. 

Мөн урсгал зардал замбараагүй нэмэгдсэн ба хаа сайгүй хурал зөвлөгөөн болж байна. 

"UG Arena"-г дүүртэл орон нутгаас хүмүүс авч ирж суулгаад "Хот үзүүлж, бэлэг өгсөн шүү. Тийм болохоор 2024 оны сонгуульд манай намд санал өгөөрэй, хүмүүст нөлөөлөөрэй" гэдэг байдлаар төсвийн мөнгийг урсгаж байгаа тохиолдол байна" гэв.